Psalmen Davidis

in Nederlandischer sangs-ryme

Verba mea auribus. Psal.v.

Dauid ballinck na veel lydens van Saul, ende vreese

[fol. 6v]

noch meer te lyden door de vleyers die omtrent Saul waren doet syn ghebedt tot Godt. Daerna vertroost hy sich seluen wan hy bedenckt dat Godt de godloosen haat, ende den vromen gunstich is.

VErneem doch myn woorden, o Heere,
Wil myn betrachten wel verstaen,
End myns gheschreys stem mercken aen.
Want ick myn Godt Koninck vol eere,
Bidd’ tot dy seere.

S’morghens seer vroech ia voor den daghe,
Du salt, o Heer, verhooren my.
Want ick sal my s’morghens voor dy
Uoeghen troost wachtend’ op myn klaghe
Die my behaghe.

Want du een Godt (niet te verschoonen)
Bist, dien de boosheyt niet behaeght,

[fol. 7r]

 

Dien oock de godloose mishaeght,

 

Welck hem met Godt niet sal ghewonen

 

Noch by hem wonen.

 

 

 

Gheensins sullen de dwase lieden,

 

Uoor dyn ooghen konnen bestaen:

 

Want du haets’ alle die begaen

 

End wercken boosheyt t’allen tyden

 

Met een verblyden.

 

 

 

Du salt oock gantslick die daer lieghen,

 

Brenghen tot verderf end in pyn,

 

Die Heer haett die bloetghierigh syn,

 

End die daer altyt met bedrieghen

 

Om te gaen pleghen.

 

 

 

§1 Mer ick, Heer, op dyner ghenaden

 

Ueelheyt eensdeels an my ghedaen,

 

Sal in dyn heyligh huys ingaen,

 

T’anbidden door dyn vreess beraden

 

Sonder verspaden.

 

 

 

O Heer gheef my door dynen seghen,

 

In dyn trauwe gherechticheyt,

 

Om mynr vyanden wil gheleydt,

 

End bereyt my dyn wegh te deghen

 

Uoor all’ afweghen.

 

 

 

Want niet vasts is in hueren monden,

 

Huer hert’ is gaer beueynst, kurt af,

 

Huer kel’ is recht een open graf,

 

Huer tonghe werdt oock t’allen stonden

 

Uol smeeckens vonden.

[fol. 7v]

 

Uerdrays’, O God, laetse veruallen

 

Uanden raedslaghen die sy doen.

 

Uerderfs’ om huere swaer misdoen,

 

Want sy syn oproerigh gheuallen

 

Teghen dy allen.

 

 

 

End laets’ alle vro syn van sinnen,

 

Die hen gaer vertrauwen op dy,

 

Laets’ éewlick met vrueghdstemme vry

 

In dy vroo syn met den, die dynen

 

Naem recht beminnen.

 

 

 

Want du bewyst veel goeds, o Heere,

 

Den gherechten mensche met spoed:

 

Du salt hem met dyn gunste goedt,

 

Euen als met een schilt end speere,

 

Wesen syn weere.

Ghebedt.

§ O Godt onse koninck ende Salichmaker, na dien wy onse betrauwen op dy alleene ghelecht hebben, dy te aenbidden in Gheest ende waerheyt, veracht niet dat roepen ende ghebedt dyner armen dienaren die daer verweldight ende verdruckt syn door dyne vyanden, ende houd ons altyt onder dyner heyligher bescherminghe, totter tydt toe dat wy vereerlickt syn met onsen hoofde ende Heere Iesu Christo, Amen.