Psalmen Davidis

in Nederlandischer sangs-ryme

Cum inuocarem. Psal.iiii.

Dauid in der conspiratie Absalons, roept Godt aen, straft de princen Israel die teghen hem conspireerden, roept de selue tot boete: ende besluyt, dat hy sich wel vindt, daeromme dat hy op Godt vertrauwet.

GOdt mynr gherechtheyt, so wanneere
Ick dy aenroepe verhoor my,
Bringh my wt angste int breyd, o Heere,
Erbarm mynr na dyn gnade teere,
Ende myn ghebet verhoor vry.
Hoe langh sult ghy, o boose lieden,
Myn eer soecken

[fol. 5v]

te niet te doen?
Hoe langh sult ghy aen alle syden
So lief hebben die ydelheyden,
End na de loghen trachten koen?

Wetet vrylick end slatet gade,
Dat die Héer met blyde gheschal
Bestemt héeft den Koninck wt gnade:
De Héer sal my kommen te stade,
Wannéer ick hem aenroepen sal.
Béeft deghelick ouermits desen.
Ende sondight teghen hem niet.
In uw hert wilt ghedachtich wesen
In uw camer met éen stil wesen
Sonder my méer t’ andoen verdriet.

Offert daerna met herten goede
Den offer der gherechticheyt,
Met éenen ghebroken ghemoede,
End hoopt op den Héer beyd’ in spoede

[fol. 6r]

 

End in allerley teghenheyt.

 

Uele segghen, wie sal’t doch wesen,

 

Die ons véel goeders sal doen sien?

 

Daer du dat selue syst ghewesen,

 

Héer, hef dyns aenschyns licht mits desen

 

Op ons, wy dy staerlick aensien.

 

 

 

Want daerdoor sal ick t’allen stonden

 

Méer vrueghds hebben end blyschap soet,

 

Dan die daer véel koorens opgronden,

 

End by welcken véel wyns beuonden

 

Werdt in allerley oueruloedt.

 

So dat ick in vrede sal rusten,

 

Ende slapen in sekerheyt,

 

Want du syst edt die my berusten

 

Doest, Héer, met vroeylickheyt end lusten,

 

End met duerigher vasticheyt.

Ghebedt.

O Heere Godt, die du bist de oorspronck aller gherechticheyt, ende wetest de groote aenslaghen, daermede wy an allen syden bespronghen werden, versteeck onse ghebedt niet, mer maeck dat wy dyne gunste ende goedicheit gheuoelen, Op dat wat verdruckinghe ons ankomme, wy niet laten te leuen in vrede, vrouwde, ende gherusticheyt des gheestes, verwachtende de eewighe ruste die du dynen kinderen belooft hebst door dynen Sone Iesum Christum. Amen.