Hondert Psalmen Davids mitsgaders het ghesangk Marie, t'ghesangk Zacharie, t'ghesangk Simeons

de thien Geboden, de artikels des Gheloofs, t’ghebed des Heeren &c. ouerghesett in Nederlandschen dichte

Benedixisti Domine. Psal.lxxxv.

§ Dauid, door den heylighen Gheest, singt end proopheteert, van der toekomste Messie, end van syn gheestelicke koningkrycke, waerin vrede, gherechtigheyt, end waerheyt souden regneren, als Esa.xi. staet, Hy bewyst oock hoe der gheloouighen sonden wegh ghenomen syn, door Christum, so Dani.ix end Miche.vij. staet, end t’gantse nieuwe Testament leert.

§ Singt op de wyse des lxij. Psalms.

DYnen ęrdryckɇ, Heer, gnade heefstu ghedaen,
Du heefst Iacob van den banden ontslaen,
Du heefst dyns volcks boosheyt ghenomen wegh
Al syn sonden, wt ghenadɇ, heefst bedeckt,
Dyn gramschap groot heefstu versoett ten ende,
End dynen toorn, daer van, oock willen wenden,

Keer dy tot ons, God onser saligheyt,
Wend van ons af den brand dynr toornigheyt,

[fol. 74v]

 

Wilstu alwegh teghen ons syn verstoort,

 

Of dynen toorn vertrecken van nv voort,

 

Bistu niet, die ons ten leuen sal bringhen,

 

Waervoor dyn volck in dy sick sal ontspringhen.

 

 

 

Toon doch, o Heer, ons dyn bermhertigheyt,

 

Ghenadelick gheef ons dyn saligheyt,

 

Hooren wil ick wat daer spreeckt de Heer mild,

 

Want hy tot syn volck vrede spreken wilt,

 

End tot den die weldadigh syn tot allen,

 

Op dat sy niet tot sotticheyt veruallen.

 

 

 

T’heyl is voorwaer den godvreesighen by.

 

Op dat by ons d’heerlicheyt woone vry.

 

Gnade, end waerheyt komen sick in’t ghemoed,

 

Gherechtheyt, end vrede sick kussen soet,

 

T’ghelooue sal vast spruyten, wter ęrden,

 

Gherechtheyt sal, van hemel, gheschauwt werden.

 

 

 

Die Heer sal oock syn goedertierenheyt

 

Gheuen seer mild, end storten ouer breyd.

 

Onß ęrdryck sal syn vruchten bringhen voort.

 

In oueruloed, na onses Heeren woord,

 

Gherechtigheyt sal voor den vromen treden,

 

End hy sal fyn ouer-wegh gaen mit vreden.