11. ander Psalmen

Het Argument des 85. Psalms.

Dauid door den heylighen Gheest singht ende propheteert van der toekoemste Messie, ende van zijn gheestelick Coninckrijcke, in't welcke gherechticheyt, vrede ende waerheyt sullen regneren, gelijck oock Esa.11. staet, ende eyndelicken bewijst hy oock hoe der gheloouiger sonden, door Christum wechgenomen zijn, so Danielis in't 9, ende Mich.7. staet, ghelijckt oock het gheheele nieuwe Testament leert.

Dijn aertrijck Heer ghenade hebstu

[fol. A7v]

 

ghedaen,

 

Du hebst Jacob van den banden ontslaen.

 

Du hebst dijns volcks boosheyt ghenomen wech,

 

Sijn sonden al wt ghenaden hebst bedeckt,

 

dijn gramschap groot, hebstu versoet ten eynde,

 

End dynen thoorn daervan oock willen wenden.

 

 

[fol. A8r]

 

Keert dy tot ons God onses salicheyts

 

Went van ons af den brant dijns toornicheyts

 

Wilstu alwech teghen ons zijn verstoort

 

Of dynen toorn vertrecken van nu voort

 

Bistu niet die, ons ten leuen wilt bringhen

 

waer voor dijn volck in dy sick sal ontspringen

 

 

 

Thoont doch O Heer ons dijn barmherticheyt,

 

ghenadelick gheeft ons dijn salicheyt

 

Hooren wil ick wat God de Heere mildt

 

Spreeckt, want tot zijn volck vrede spreken wilt,

 

Ende oock daertoe weldadich zijn tot allen

 

Op dat sy niet tot sotticheyt veruallen. ⁺

 

 

 

T'heyl is voorwaer den godureesenden by

 

Op dat by ons d'heerlickheyt ware vrij

 

ghenade en waerheyt komen sick in't gemoet

 

Rechticheyt en vreed sullen sick kussen soet

 

T'ghelooue sal vast spruyten wt der aerden

 

gherechticheyt sal wt den Hemel gheschout werden.

 

 

 

De Heere sal oock zijn goedertierenheyt

 

Gheuen seer mildt en storten ouer breyt

 

Ons aerdtrijck sal zijn vrucht brengen voort

 

In oueruloedt al na des Heeren woort

 

Gherechticheyt sal voor den vromen treden

 

En ouer wech sal hy fijn gaen in vreden.

+ Dit is den staet van den gelucsaligen tijd des geestelicken Konincrijcks Christi.