Kleyn liedtboecxken
(1633)–Pieter Jansz. Twisck–
AuteursrechtvrijNa de wijse: Reyst buyten 's landts, als Coopman vroet.
EEn nieu liet wil ick heffen an:
V begheert can // ick volghen dan:
Weduwen moetmen als een man
Wesen, nae Sprachs leere,
Hout u reyn en het quaedt wijckt van.
Denckt om den wan // en sware ban,
Om d'eeuwighe helsche pan,
Daer den Heer alder Heeren
De quae'n mee sal verteeren.
Maer die sijn wil hebben ghedaen
En op sijn baen // gestaed'lijck gaen,
Sullen d'eeuwighe croon ontfaen
Al in het eeuwigh leven:
Het is mijn vriendelijck vermaen
Te houden aen // laet u niet vaen
Deur groot laster en versmaen,
Diemen nu veel siet sweven.
'Ten sal u gheen troost gheven
| |
[pagina 328]
| |
Als Godt eens sijn heyl'ghen vermaert,
Liefende waert // by een vergaert,
En ghy daer niet mee zijt ghepaert:
Wat sal' u moghen baten,
Daerom u van gheen mensch vervaert.
Soeckt slechts Gods aert // wederghebaert.
Leght af al't gheen dat u beswaert,
En stelt u gantsch ghelaten
Om Godts woort te aenvaten.
Doch ick heb noyt anders ghehoort:
Godt help u voort // al na sijn woordt,
Wacht u van twist, strijt en discoort:
Weest neerstigh goet te pleghen:
Want die in dees tijdt licht'lijck sloort,
Wordt haest versmoort // neerstelijck boort,
Deur smalle wegh, enghe poort,
Soo sal Godt u sijn seghen
En ghenadighen reghen
Wel gheven overvloedelijck.
Neemt gheen afwijck // eenigh omkijck,
Al cost het menigh sware sijck.
Wat is een mensch doch meere,
Dan aerd', as, vleys, bloedt, dreck en slijck,
Een ooghe blijck // roock, schijn, swijck:
Weest in u eyghen oogh niet rijck:
| |
[pagina 329]
| |
Want die haer hier verneren,
Comen voor Godt ter eeren.
Leert vanden Heere waer ootmoet,
En rechte boet // die 't hert omwroet
En neerstigh nae het goede spoet:
'Tis Godts welbehaghen.
En acht niet wat van vleys en bloet
Wordt uytghebroet// 'ten is niet goet:
Hoe schoon dat het hem hier op doet,
'Tmaeckt niet dan enckel knaghen,
En een eeuwigh wee-claghen.
Kiest liever voor een cley verdriet,
Dat hier gheschiet // en haest wech vliet,
Eeuwighe vreught verandert niet.
Ick wensch u Godes vrede,
Hier mede soo end ick mijn liedt.
Vindt ghy noch yet // teghen 't ghebiedt
Van Godt, dat selve haest uytwiedt.
Houd u na Pauli reden,
Ghestadigh in ghebeden.
Na beter. |
|