Kleyn liedtboecxken
(1633)–Pieter Jansz. Twisck–
AuteursrechtvrijNa de wijse: O Heer aensiet al mijn lijden groot.
MYn vrient gedenct met aendacht en vlijt
Van waer dat ghy eerst ghecomen sijt,
Waer ghy oock weder moet keeren,
En wat u te doen staet in dees tijdt,
| |
[pagina 316]
| |
Ghy sulter veel goets uyt leeren.
V selven sult ghy verliesen fel,
En Godt weer vinden, dit wisselt wel,
Quaedt wil om't goede versetten,
Wilt wat ghy moet, doet wat ghy cont snel
Weest dat ghy sijt, na Godts wetten.
Vertoon niet, soo ghy niet en wilt zijn,
Offert Godt u eyghen dierelijn,
Om 't God'lijck weder te ontfanghen,
Verset die eyghene wille dijn,
In Godes wil met verlanghen.
Want als wy moeten, en willen niet,
Soo zijn wy slaven, met groot verdriet,
Maer als wy willen met eeren,
Al wat Godt wil, gheeft ende ghebiet,
Soo zijn wy Vry-bander-heeren.
Alle strijdt die wy hebben ontstaet
Om dat wy met wille en ghelaet
Niet en doen soo wy behooren,
Waer ons wil met Godts wille gaet,
Daer wordt lijdtsaemheydt gheboren.
Is hier wat lijdens dat lijden wy
Om ons eyghen wils wille onvry,
Want waer onse eyghen wille
Niet teghen Godts wil 't geender ty,
| |
[pagina 317]
| |
Soo en wasser gheen verschille.
Daer is ghedult der heylighe ree,
Waer ons wil is, met Godts wil te vree,
Verduldigheydt met ghenuchten,
Is 't gheloofs herrebergh ende stee,
Een acker vol goede vruchten.
Maer waermen lijdt en niet lijden wil,
Daer is niet dan verdriet en gheschil,
En een ghedubbelde plaghen,
Houdt u onder Godts handt rustigh stil,
Ghy sult u druck lichter draghen.
Die het alletijdt heeft eenderley,
Die en can niet leeren allebey,
Maer door veel verscheyden saken
Crijghtmen gheoefende sinnen tey
Om 't nae Godts wil af te maken.
Want die noyt teghenheydt heeft ontfaen,
Can hem tot lijden niet wel verstaen,
Hoe can't altijdt wel ghelucken,
Daerom waer ghy niet cont overgaen,
Daer wilt goedwilligh onder ducken.
Na beter. |
|