Kleyn liedtboecxken
(1633)–Pieter Jansz. Twisck–
AuteursrechtvrijNa de wijse: Van welcken lant soo comst du her. Ofte: Een goet nieu liedt heb ick bedacht.
VVIlt ghy die smalle wegh in gaen,
Die daer leyt tot den leven,
So wilt die werelt heel versmaen,
En u tot Godt begeven
Sijt ghy aen't aertsche goet noch vast,
Hoe wilt ghy 'tHemels minnen,
Voorwaer ghy sijt u eyghen last,
Stelt u hert ende sinnen
Recht anders als die werelt doet,
Wilt u selven versaken,
Hebt ghy tot dese wegh gheen moet,
Soo wilt u reys vry staken.
| |
[pagina 256]
| |
Want u sal seer veel onghemack
Op dese reys ontmoeten,
Met lijdtsaemheyt vervult u sack,
Ghedult doet druck versoeten.
Waer dat ghy niet over en meught
Daer wilt doch onder duycken,
En stelt in Godt al u ghemeught,
Wat Hemels is wilt pluycken.
Want by God en gelt niet dan geest
Waer toe dan veel vergaren,
Hebt ghy u selven vet gemeest,
'tDient tot u selfs beswaren.
Die hem op reyse gheven sal
Wil niet geeren veel draghen,
Veel omslaghen in't aertschen dal,
Dat sijn u eyghen laghen.
Wat wilt ghy op een smalle oort
Al na veel schatten wroeten,
Als ghy comt voor die enghe poort,
Sal't daer doch blijven moeten.
Hier gelt gheen eer, gheen schat noch goet,
Al gaet ment hier groot achten,
V siele inden Heere voet,
Wilt het Hemels betrachten.
Al verliest ghy u goet, u min,
| |
[pagina 257]
| |
Wilt daerom niet vertsaghen,
Beletsel van't meeste ghewin,
Sijt ghy slechts van ontslaghen.
Cleyn onderwin maeckt groote rust,
Hoe datmen min begeret,
Hoe datmen meer besit met lust,
En hoemen min verteret.
Hoe datmen dies te meer behoudt
Nae den gheest en lichame,
Wie sijn begeerlijckheydt bedoudt,
Leydt een leven vreedtsame.
Men siet die mieren op der aerdt
Met moeyte veel vergaren,
Die Voghels van Hemelscher aert
Achten niet veel dees waren.
Met die Mol door die aerde cruypt
Sonder u te besmetten,
Een cloot weynigh op d'aerde sluypt
Canmen die loop minst letten.
Maer wat vlack op der aerden leyt
En can niet wel voort comen,
V herte tot 't Hemelsch bereyt,
Soo wordt ghy daer vernomen.
Na beter. |
|