Kleyn liedtboecxken

[Wy willen dees bruylofts feest houwen]

Na de wijse: Hoe legh ick hier in dees elende.

VVy willen dees bruylofts feest houwen
Met vreugt en blijtschap inden geest
Niemant laet sijn herte verstouwen
Als oft soo noyt hadde gheweest,
Laban liet een Bruyloft bereyden

[p. 75]

 

Als hy Iacob Lea toe leyde.

 

Moses gaet Israel oock leeren,

 

Der geenre die een maegt uyt geeft,

 

Dat hy in spijse en bruylofts kleeren

 

Haer niet vercorte, maer beleeft

 

Ende behoorlijck moet handelen,

 

Laet ons in deucht eerlijck wandelen.

 

Simson liet met sijn Bruyt toe stellen

 

Een Bruyloft soomen pleech te doen,

 

Met mede speelinnen, ghesellen,

 

Maer een ontuchtich wesen groen,

 

En wil ons gantsch'lijck niet betamen,

 

Maer stichtlijcke raedtsels bequame.

 

Als Simson sijn Bruylofts ghenooten

 

Tot leeringhe heeft voort ghebracht,

 

Wilt malcander quetsen noch stooten,

 

Maer neemt op goe leeringhe acht,

 

Om desen Geest wel te vercieren,

 

Met eer, lof, deucht en goe manieren

 

Tobias die en wilde niet eten

 

Opt gastmael van Raguel bereydt,

 

Maer hy begeerde eerst te weten

 

Of hy hem oock Sara toe seyd,

 

Nae die segeningh ende trouwen

 

Hebben sy die Bruyloft gehouwen.

[p. 76]

 

Den Enghel die ginck Nabal te noden

 

Nu ter Bruyloft te comen daer,

 

Hy wenscht sijn seghen, niet door boden

 

Maer door hem selfs, dit lieve paer,

 

Sy hielden in Godts vrees met vreughde

 

Die Bruyloft met soete gheneughde.

 

Als Tobias wat langher beyde

 

Al door den Bruyloft alst behoort,

 

Soo is hy met sijn Bruyt ghescheyden

 

Van't gheselschap, ende trock voort

 

Sijn ouders te stellen in rusten,

 

Ende socht gheen wereltsche lusten.

 

Die Heere Iesus ginck oock vereeren

 

De Bruyloft tot Cana soo soet,

 

Hy deed' water in wijn verkeeren,

 

Sijn eerste teecken hy hier doet,

 

Tot Godes prijs minst ende meeste,

 

Hout met vreughde sulcke Feeste.

 

Schout overvloet in eeten drincken,

 

In kleeren en cost'lijck ghewaet,

 

Waer toe aen beyde sijden hincken,

 

Dient Godt met hert mont en ghelaet,

 

Ydel ghesanck wilt altijdt vlieden,

 

Looft Godt met gheestelijcke lieden.

 

Als oock met Psalmen en Lofsanghen,

[p. 77]

 

Nae de eeuwighe Bruyloft soet,

 

Set uwe hert, sin ende ganghen,

 

Verciert u met ware ootmoet,

 

Soo sult ghy namaels sijn verheven,

 

Ende met Godt eeuwelijck leven.

Na beter.