Samle fersen (= Verzamelde gedichten)

It nije Kollumer oproer

Wa het fan Pake of Beppe net
Fan 't âlde Koll'mer oproer heard?
Wa waard dat net ferhelle?
En wa kin ek yn dizze tiid
Fan strjitskandaal en tsjerkestriid
Fan 't nije net fertelle?

Yn d' âlde tiid, as 't Roomske swurd
Wer nije lannen hie teskuord,
Dy't jitte yn 't bloed omdreauwen,

[p. 244]

 

Dan bouden s' op dy weake grûn

 

In sterk kastiel, om fier yn 't rûn

 

De fijân baas te bliuwen.

 

 

 

No stiet te Kollum sa'n kastiel,

 

Om oer de frije Fryske siel

 

In eachje yn 't seil te hâlden;

 

It is fan 't grutte Rome net,

 

Mar fan in oare útman set

 

As twangstôk oer de Wâlden.

 

 

 

De grutte paus fan Amsterdam,

 

De liepe kûper Abraham,

 

Liet dat kastiel hjir bouwe;

 

Mar inkle jierren hie 't dêr stien,

 

As 't hie al skoan fertuten dien

 

En brocht al leed en rouwe.

 

 

 

Mei pyl en bôge of krûd en lead

 

Bringt dit kastiel ús net de dead

 

Of - slimmer! - slavernije;

 

Nee, bibelteksten binne 't swurd,

 

Dêr Fryslân mei besprongen wurdt;

 

De siele sil 't belije.

 

 

 

Dêr iendracht wenne en 't leafdeljocht

 

De Kristnen sneins tegearre brocht

 

Om freedsum del te sitten,

 

Om yn Gods hûs de wrâldske skyn,

 

Dy deis jin makket d' eagen blyn,

 

Foar hegers te ferjitten -

 

 

 

Dêr sil no, troch dit grut kastiel,

 

In letterrûzje siel fan siel

 

En hert fan herten skiede;

 

Dêr moast no, foar de twadde kear,

 

De Kristus - 't hjit, himsels ta ear! -

 

Foar minskesonden bliede.

[p. 245]

 

aant.

 

Hoe, grutske ‘harders’, earme ‘skiep’,

 

Kaam sa 't gewisse yn 'e sliep?

 

Wêrearne moat it hinne,

 

As 't hiele folts yn oproer komt,

 

En d' iene d' oare wreed ferdomt,

 

Omt doomnys deilis binne?

 

 

 

Is dit ‘'t begjin fan d' ein’?.. Gods hûs,

 

De tsjerke, in plak fan kriichsgerûs!....

 

Hjit dit no timpelbouwen?

 

Nee, binn' jim langer blyn en dôf,

 

De hiele tsjerke brekk' jim ôf...

 

Is 't net om te besauwen? - -

 

Hoe lang, hoe lang jit hâldt it oan -

 

Betink it, lytse minskesoan,

 

Lit jimme haat ferdwine! -

 

Dat hiel de wrâld ien timpel is?...

 

O ljocht, brek troch de tsjusternis;

 

Wol ek har hert beskine!