Tori di switi foe leisi

[p. 19]

Maskita e soetoe: foe sanede?

A tori disi na foe sma di lobi jere tori. Mi e go ferteri wan pikin tori foe maskita. Oen sabi fa maskita kan soetoe oen èn fa a kan bari na ini sma jesi. Ma a no so nomo. Mi sa ferteri oen fa dati doe kon.

Langa langa jari kba, toe jongoe sma ben seti libi. Den ben e libi toemsi kolokoe. Den no ben abi pikin

[p. 20]

ete. Ma a man ben lobi a frow, a frow ben lobi a man. Ma joe sabi te den sani dati de, dan ala ten wan sani e kon na mindri foe pori en. Èn na so dede ben kon na den mindri. Dede ben djaroesoe foe di den sma ben lobi densrefi so. Dan dede teki a frow. A frow dede.

Mi naf' taigi joe fa a man sari. A man sari sote. Heri dei, heri neti ai krei. A no wani beri a dede oema. Ala sma e taigi en taki: ‘Ma joe moes foe beri a oema.’

A taki: ‘Mi no e beri en.’

Den taki: ‘We, dan joe no kan tan na a presi dja, bikasi te foe kba, no wan sma no e go man libi dja. Fa oen kan abi so wan dede sma na oen mindri? A no sa de wan gosontoe sani.’

A man taki: ‘We, dan mi nanga mi dede wefi sa gwe na tapoe liba.’ A teki wan boto, a domroe a dede wefi. Dan a go libi na tapoe liba. A so wantoe wiki kon psa. Foe taki leti, a ben sreka a dede so dati a dede ben kan ori. Ma dan wan dei so, a si wan tra boto e kon. Èn na ini a boto dati wan granpapa ben sidon, wan granmasra di ben abi foeroe ondrofeni. A granmasra aksi en taki: ‘Masra, mi si taki joe e sari. Joe ben sa wani a wefi baka?’

A taki: ‘Ja, mi granmasra.’

Granmasra taki: ‘Ma mi ben sa gi joe a rai foe joe no teki en baka, jèrè. Libi en so. A betre joe go na lanpresi baka, dan joe beri en.’

A taki: ‘No, mi wani a oema baka. A ben de wan moi oema. A ben lobi mi. Mi srefi ben lobi en.’

A granpapa taki: ‘Mi e warskow joe.’

[p. 21]

[p. 22]

A taki: ‘No, noti no o psa. Joe kan meki a kon baka a libi?’

A granmasra taki: ‘Ai.’ A granmasra ben de wan koni man. Dan a taigi a man taki: ‘Gi mi joe finga dja.’

Joe sabi te joe go na datra foe go prik. Den e loekoe efoe joe abi soekroe, efoe joe sali boen, nanga den sort'sortoe sani dati. We, na so a granmasra boro en finga nanga wan nanai. Dan wantron so wan dropoe broedoe kmopo na ini en finga. A granmasra seki en finga meki a dropoe broedoe fadon na tapoe a dedeskin foe a oema.

We, joe no bribi lei, joe no bribi troe. A oema kon baka na libi. A ben de net so moi leki fosi a dede. Ala toe ben prisiri sote. Den brasa makandra. Ma dan den taki: ‘Joe sabi san, oen no e go moro na sjoro. Wi e tan libi na tapoe a liba.’

A so a sani ben e go. Den ben de net so kolokoe leki fa den ben de fosi. Te den ben go na sjoro foe bai sani foe njan, dan a man wawan e go. A oema ben tan ini a boto. Den e bori ini a boto, dan den go baka na mindri liba.

Ma wan dei so, di a man kmopo na wowjo nanga ala den sani di a bai, den groentoe nanga den meti, dan a man loekoe, a taki: ‘Kande mi no e si boen. Mi no e si wan boto, ma mi e si toe boto. Sei a boto foe mi, wan tra boto de.’

Èn foetroe, di a kon krosbei, a si taki wan tra boto ben de na sei den boto. Èn a oema taigi en taki: ‘Jere, mi no lobi joe moro. Mi e go libi nanga a man disi now. Mi no wani joe moro.’

[p. 23]

[p. 24]

A man kisi wán atibron. A taki: ‘Joe, joe kon na libi nanga mi broedoe! Dan na disi na mi tangi, no?’

Dan now a oema atibron. A soetoe ensrefi nanga wan nanai. Dan so leki fa a broedoe ben kmoto na a man skin, na so a kmoto na en skin toe. Ma di a ben wani trowe a dropoe broedoe - soboen a ben wani gi a man en broedoe baka, dan a broedoe no fadon na tapoe a man, ma a fadon na ini a watra. Ma leki fa a broedoe fadon na ini a watra, a so ensrefi toe fadon na ini a watra.

[p. 25]

A man srefi kon skreki. Ma san a si? Moro a oema e saka go na ondro, ai tron soso doti nanga asisi. Soleki fa oen kon na grontapoe taki Gado meki oenoe foe doti, na so a frow kon tron. Now a dede troetroe. A panja na ini a watra. A tron doti. A tron asisi.

Dan a doti disi, bakaten a tron pikinpikin pikinpikin woron, den woron di joe e si na ini den watrabari. Na den woron dati e tron maskita.

Dan now a man taki: ‘Ai, a granmasra ben warskow mi. A ben taigi mi taki: “A betre joe no teki a frow moro.” Mi no ben wani jere. Ma now mi si taki a abi leti. Ma mi sa teki wan tra frow èn mi sa seti libi baka.’ A so a psa. A trow nanga wan tra frow. A kon kolokoe baka nanga en frow nanga en pikin.

Dan now a dedeskin foe a frow, di tron soso doti nanga asisi, a tron woron di e meki maskita. We, den maskita di e kmopo na ini den woron, a dati e bari na ini sma jesi èn den e soetoe joe. Bikasi a hati a oema dati a man atibron nanga en, foe taigi en taki: ‘Na mi dropoe broedoe meki joe kon na libi.’ Na so a wani meki libisma moes firi pen toe. Dan ai soetoe oenoe, dan ai bari na oen jesi.

Te so fara.