Tori di switi foe leisi

[p. 10]

San Gado doe a reti troe

Tide mi e go ferteri oen wan Gado tori. A tori disi, na wan bigisma ben ferteri en. Wi e kari en so: oen abi wan moi singi na ini a singi boekoe, a singi nen: ‘San Gado doe a reti troe, alwasi ai lon watra.’ We oen jere, oen arki.

Wan pisten langa kaba, wan famiri ben e libi na wan poti oso. Potisma den ben de. Nownow efoe joe jere o diri den kamra oso de, hè, bijna joe no man pai. Ma a ten dati joe ben kan joeroe wan pikin oso feifi goloe noso zeven vijftig. We, na so a famiri disi ben abi wan papa, wan mama, nanga toe pikin, wan foe aiti jari nanga wan foe neigi jari. Den pikin no ben de toemsi bigi. A sori leki den ben e libi switi nanga makandra.

Ma joe sabi switi na wan sani, te joe swari en joe no e tesi en moro. Bakra taki: ‘Lekker is maar een vinger lang.’ Te a psa joe tongo, a doro na joe gorogoro, joe no e tesi a switi moro. Èn na so a de nanga a libi toe. Den sma e libi poti fasi, ma tog den ben de kolokoe.

Ma wan dei a mama foe a famiri disi kon siki boen hebi. A siki so wan fasi dati di a kon opo pikinso, a no ben kan kebroiki en anoe, a no ben kan kebroiki en foetoe. A ben kon lan. Soso taki a ben kan taki. Ala sani ben moe doe gi en. Den ben moe poti njanjan gi en na ini en mofo. Efoe wan freifrei de na en tapoe, wan sma moe naki en poeroe. Joe srefi sabi a sani dati, san wani taki joe lan. Joe no

[p. 11]

man waka. Soso didon. Sma moe jepi joe, dan joe sidon na ini wan bigi stoeroe. A so a sani ben de. Joe kan prakseri fa ala sma ben e sari.

Den pikin, den ben jepi den mama someni leki den kan. A papa no ben abi moni foe go joeroe wan zuster. So na en srefi ben de ala sani. A ben de koki, a ben de was'frow, a ben de zuster. A jepi den pikin foe den njan, foe den kan go na skoro. Dan ai kon, a abi foe jepi a frow. Joe srefi kan ferstan taki a libi no ben kan de prisiri, kwet'kweti.

Ma den ben de bribisma, so den ben e begi ala dei foe Masra sa lekti a hebi disi gi den. A no fa wi e prakseri Masra e jere begi. A no te wi wani, Masra e jere begi. Ma te Masra feni en boen, èn a fasi di a feni en boen, na so ai jere na wi. Èn na so a ben de nanga a tori disi toe. Wan dei Masra jere a begi foe den. Dan Masra kari Dede, a taki: ‘Jere, mi e go seni joe go na grontapoe na a famiri dati. Joe moe go, dan joe teki a papa.’

Hm? Dede skreki. Noiti Gado no e meki fowtoe. Ma disi leisi a prakseri taki: ‘Kande Gado ben wani taki meki mi go teki a mama. Ma Gado taki meki mi go teki a papa. Ma mi sa doe san Gado taki, jèrè.’

Dede kon na grontapoe, a go na a oso pe Gado seni en. San a si? A si fa a masra ben poti toe pisi brede gi den pikin foe den go na skoro. Dan a feni wan pikin ten foe krin a frow. Bika joe srefi kan ferstan dati wan leti moni no ben e kon.

Froekoe mamanten, feifi joeroe mamanten fosi den sma opo, dan a man disi ben e go na watrasei. Now na truck nanga bigi wagi e tjari bana nanga den sani dati. Ma a ten dati na kroejara. Pasi no ben de.

[p. 12]

[p. 13]

Den sma e kon nanga den kroejara, den kon na watrasei pe wi e kari lijnsteiger. Ala sma sabi bakawowojo. Dan den boto e kon nanga bana nanga kasaba, nanga den sani leki apresina, groentoe, èn so moro fara.

Dan a man ben e gwe froekoe. Fosi feifi joeroe ai opo, a gwe na watrasei, dan a go loekoe pe den man e tjari den bosoe bana. Wanwan bana e fadon na pasi, wan kasaba e fadon na pasi, a so ai piki, ai go bori gi den sma.

Di den man di abi den boto si fa a man disi ben e doe foe feni wan sani foe njan, dan den aksi en taki: ‘We, joe e piki den sani. Joe no wani kon jepi oen wroko foe poeroe a lai?’

A taki: ‘Ija.’ Dan na so a ben kon feni wan pikin wroko na den boto. Ai sjow bana. Dan a ben kisi pikinso moro. Den gi en wantoe sensi foe a kan bai wan stimofo.

Ma now Gado taki Dede moe kon teki a man. Dan a joeroe di a go foe go teki a man, dan a si taki net a man ben krin a frow, e wasi en, weri krin krosi gi en. Joe kan prakseri nanga foeroe moeiti, bika a no ben abi no wan sma foe jepi en. Dede seki en ede, a taki: ‘Èhè, mi no kan teki a man disi. Mi bribi taki dis' leisi Gado fowtoe.’ A go baka na Masra Gado, a taki: ‘Masra, soema joe ben seni mi foe go teki?’

Masra taki: ‘Mi taigi joe taki joe moe go teki a man.’

Dede hari en skowroe. Dati wani taki: ‘Mi no e ferstan Gado now, jèrè, ma mi sa go.’ A saka go baka na grontapoe. Dan disi leisi a si taki a man ben klari foe gi en frow njanjan. Ai taki nanga en bika

[p. 14]

den kan taki. A oema e taki en tangi taki: ‘Efoe mi no ben abi joe, dan fa mi ben sa bigin dan? Tje, na Masra srefi seni joe kon gi mi.’ A figi a frow mofo, gi en watra, piki piki den dot'sani. A ten dati den pikin kmopo na skoro, den njan toe. Dan a man go na wan pikin broko koekroe, ai tjari den dot'sani go wasi.

Leti na mofo a koekroe so, Dede naki en. A fadon nanga langa so. A frow de na ini a oso, a si fa en man fadon. A bari, a bari sote. Den pikin srefi bigin bari. Den e krei.

We, mi nanga joe, wi a no Gado. Dan san oen ben e go taki? Wi e taki: ‘Mmm. Dati na ogri-ati foe Dede foe kon teki a man disi. Didjonsro a frow taki en man tangi taki: “Efoe Masra no ben seni joe gi mi, fa mi bo doe?” Dan now Dede teki en. Fa dati kan dan?’ Dan wi e go kroetoe nanga Gado. Dati na wi libisma.

Ma di den pikin e bari so, a frow e bari toe, dan net so, wan ifrow e kon psa. A weri en krosi krin moi netjes. A tjari wan prasoro, a son ben hati. A soetoe en ede go na ini a doro, dan a taki: ‘San de foe doe dja? San wi e bari so dan? San de foe doe?’

A frow taki: ‘Mi Gado, frow. Ifrow, go loekoe gi mi. Mi bribi mi masra dede, bika a fadon, a no e opo moro. Go loekoe gi mi san de.’

Den pikin e bari, den tnapoe na den papa sei. Di a frow doro, a taki: ‘Sari.’ A seki en ede, a taki: ‘Frow, mi no abi no wan boen boskopoe gi joe, jèrè. Joe masra dede. Mi no taki joe no moe sari. Mi no taki joe no moe krei, ma wi e tan begi Gado. Gado e go jepi. Mi e go jepi joe doe ala sani. Joe no man

[p. 15]

[p. 16]

doe noti. Mi e go kari sma foe kon opo a dedeskin, mi e go beri a dede. Mi sabi taki joe no abi moni. Ala sani e go kon boen.’

Èn na so a psa toe. A frow meki den beri a dede. Toemsi sari. A dame kari wan datra foe kon loekoe a frow. Datra kon ondrosoekoe en. Datra taki: ‘We, a oema disi, a moe kon na ati-oso. Na oso mi no kan jepi en. A moe kon na ati-oso, dan ala sani mi sa loekoe. Kande oen kan doe wan sani gi en.’ Den pikin no ben kan tan na oso den wawan. A frow taki: ‘We, mi sa teki den pikin go na mi oso.’ A so a psa. Den pikin go na a frow oso. A frow e sorgoe boen gi den.

Toe tron na wan wiki den go loekoe den mama na ati-oso. Den si fa den mama e kon moi betre. A wan anoe no saka helemaal, ma a tra anoe kon boen baka. A kan doe wan pikin wroko. A kan waka waka. Ai fringi en foetoe pikinso, ma tog a kan waka. A kon moi betre. A frow taki: ‘We jere, dan mi teki joe kon na mi oso toe. Joe kan jepi mi doe wan pikin wroko fa joe man nanga den pikin.’

Foe meki a tori pikin sjatoe, den pikin gro kon, gro kon. Den ben leri boen na skoro. Te foe kba, a dame aksi a boi taki: ‘We, san joe o tron dan?’

A taki: ‘We, ala joeroe mi ben taigi mi papa taki mi wani tron datra. Bika efoe mi ben de datra, dan mi ben e go dresi mi mama. Dus mi wani tron datra.’

A frow taki: ‘A boen, mi e go pai a stoeka gi joe. Dan joe sa tron datra.’

A meisje taki: ‘Èn mi taki mi wani tron skoro-ifrow.’

[p. 17]

[p. 18]

A meisje tron skoro-ifrow. A boi tron datra. A so den libi toemsi kolokoe langa langa jari.

Dan di a kon so fara, dan Gado kari Dede. A taki: ‘Kon, mi o sori joe wan sani. Kon loekoe. Mi ben seni joe wan dei foe go na a broko oso disi go teki a man. Mi ben si na joe fesi taki joe no ben feni en boen. Joe ben wani kroetoe nanga mi, neleki fa den sma kroetoe. Ma joe si?’

Dede taki: ‘A troe, leki fa a singi taki.’

Gado taki: ‘Bika loekoe, efoe mi no ben poeroe a man na pasi, den bio tan nanga a pina libi foe den te leki a man srefi bo kon swaki. Den no ben abi no wan sma. Ma di mi poeroe a man, dan a dame kon jepi. Ma a no a dame jepi, ma na mi jepi.

Bikasi a dame ben de wan bribisma toe. Mamanten di a kmopo na oso, a abi wan pikin sensi, a saka en kindi, a begi mi taki: ‘Masra Gado, mi abi wan pikin moni. Sori mi fa mi moe kebroiki a moni wan boen fasi. San mi moe doe nanga en?’ We, loekoe. Joe si san a doe nanga en? A pai datra, a beri a dede, a meki den pikin leri. A no moro boen leki te a man ben tan na libi?’

Dan Dede taki: ‘Gado, joe abi leti. A so a de. San Gado doe a reti troe, alwasi ai lon watra.’

Te so fara.