Tori di switi foe leisi

[p. IV]

[p. 1]

Kartaprei

A tori di mi e go ferteri now na wan tori di psa langa, langa, langa jari kba. Na wan tori di psa na sraf'ten.

Den sma foe now, den pikin foe now, den sabi a bigi oso na tapoe oekoe foe Noorderkerkstraat nanga Lim A Postraat. EBS den e kari en now. Dape joe e go foe pai faja. Ma fos'ten a ben de wan heri tra oso nanga wan langa ston stoepoe, nanga trarkitrarki. Den ben kari en Juda Oso. Na dape a tori psa san mi e go ferteri now.

Fos'ten Kawna ben abi foeroe, foeroe kofi nanga kakaw pranasi. Wantoe foe den pranasi no de moro, wi e jere den nen soso. Ma presi leki Montresoro, Peterzorg, Nieuwgrond, Alkmaar, Leliëndaal, Katwijk (Katweki leki fa den sma e taki), ala den pranasi pranasi disi de ete.

Joe ben abi wantoe soekroe pranasi: Marjanborgoe now; ja, Rust en Werk joe ben abi toe. Go pikinso moro fara, joe ben abi Alliance. Nickerie ben abi Hasard, Waterloo. Alamala ben de boen bigi soekroe pranasi. Now, wi abi soso Marjanborgoe. Èn dan Kawna ben abi foeroe srafoe toe, bikasi foeroe wrokoman ben de fanowdoe foe wroko kakaw nanga kofi.

We, a ben de so dat' den pranasi driktoro, eri wiki den de na wroko. Den loekoe fa a libi e go. Den moe aksi den basja nanga den tra edeman fa den srafoe e wroko. Soso den srafoe di e wroko moesoe kisi pai.

[p. 2]

Den driktoro ben moe go loekoe na ini den gron, efoe ala sani ben waka boen.

Ibri pranasi ben abi en eigi srafoe. Dati oen sabi. Ma te satra bakadina, den sma no ben wroko kwetikweti moro. Satra ben de afoe dei wroko. Dan te brekten joeroe den srafoe ben kisi wan pikin pai. A no ben foeroe. Srefsrefi. Niets bijzonders. Efoe joe jere a moni joe sa skreki: wantoe pikinsensi nomo. Moro foeroe den ben kisi njanjan foe taki leti.

Te den ben pai den srafoe, ooktoe den driktoro e pai den basja. Den e kari den man disi ofisiri. Joe ben abi basja, en ooktoe joe ben abi bakra ofisiri. Den sma disi ben de na driktoro presi. Te den kaba pai den sma, den e meki klari foe go na foto, foe go njan prisiri drape.

Mi no si, ma den sma ferteri taki a ben de moi foe si na tapoe liba. Bikasi ibri pranasi ben abi en eigi srafoe. Èn ibri pranasi ben abi en eigi krosi di ai weri.

Den srafoe ben de leki wan sortoe matrosi. Den ben e lo den boen bigi tentiboto kon na foto. A no spotoe, a no joe dagoe foe joe lo boto kmoto na Katweki kon na foto. Ef' noso foe kmopo te na Marjanborgoe foe lo boto. Ma den ben lo kon. Brekten joeroe den kmopo na den pranasi. Te den doro foto na bakadina kba, sontron neti joeroe. Te den doro moimoi den e go na wan koleisi.

A koleisi na a oso di mi ben taigi joe di didon so pe EBS de now. Den ben kari en Mis' Griki Koleisi. Oen sabi san na wan koleisi. Dati wani taki, pe den sma e go prei karta, dobbel, nanga dringi sopi. Te now dati de ete.

[p. 3]

[p. 4]

Ma disi ben de wan bigi koleisi, pe moro foeroe foe den bigi driktoro e go prei karta, bikasi den ben e poti foeroe moni. Te den driktoro doro na sjoro, den tentiboto e go na wan sei. Den srafoe ben abi wan presi pe den ben kan tan. Ma mi no sabi pe.

Te den man go na ini a oso, den bigin a kartaprei satra neti. Den prei, den e prei, eri neti te dei opo. Te mamanten, den dringi wan pikin kofi, den njan wan pikin sani, den prei baka. Den prei foe hebi moni, heri dei te brekten joeroe, bijna foe kisi bakadina. Dan fosi den tapoe a prei, kmopo na a koleisi. Den srafoe sabi a ten. So a joeroe dati den de klari nanga den boto. Den man e go baka na boto foe go na den pranasi baka.

We, wan satra neti di den man de baka foe prei karta, a kon wan pis' lati kba. Tra wan wini, tra wan e lasi, joe sabi fa a sani e go. Soboen den e prei foe wan srafoe. Efoe wan man abi wan boen srafoe, a taki: ‘A boen, mi no abi moni, ma efoe mi lasi, joe kan teki a srafoe.’ Te den doro dan a srafoe e jere taki a moe go na wan tra masra. A so a ben e go.

Ma now wan neti leki fa mi taki, dan den man ben de na ini a faja foe a prei. Dan doro klop. Wan foe den man go loekoe, a si wan man tnapoe na mofodoro. A man taki: ‘Jèrè, mi jere oen de wan club djaso e prei karta. Mi kan prei toe?’ Den taki: ‘Ai, kon no.’

A man kon na ini, a ben doengroedoengroe pikinso, bikasi na wan oli lampoe ben leti nomo. A man kon sidon. Den loekoe makandra. Bikasi te wan freimde sma kon prei, den prei foefoeroe nanga en.

[p. 5]

[p. 6]

[p. 7]

So den sabi taki den go feni wan man foe den njan sensi poeroe na en skin. So den meki ai gi makandra.

Ma den man disi te den prei a karta, den ben dringi hebi sopi, janeifri nanga den sani dati. Ma a freimde man di ben kon, a no ben wani dringi sopi. Den aksi en taki: ‘Man, joe no e naki wan bita dan? Joe no e naki wan bita?’

A taki: ‘No, mi e dringi soso pet'watra.’

Hmm. Den lafoe, den loekoe makandra. ‘Pet'watra’.

Ma a presi ben abi wan boen bigi peti. Joe sabi a peti na mindri a prasi. Wan foe den taki: ‘A boen, mi sa go teki wan pikin pet'watra gi joe.’ Dan a dringi wan grasi pet'watra.

Ma di den bigin prei, den prakseri taki: ‘Mm, a man sabi a prei, jèrè.’ Bikasi bijna ala pot ai wini. Ala pot na en wawan e wini. Efoe joe loekoe a moni na en sei, a moni e gro kon, a moni e gro kon so a stapel e kon hei. Den man kon skreki. A joeroe e lon, den no e wini moro. Na a man dati e wini nomo.

Ma dan wantron so, di wan foe den man bigin stafeer den karta, sekseki den karta, meki den kon boen, dan wan karta fadon. A man di de na sei foe a man di ben e sekseki a karta, boekoendoe foe teki a karta. Ma wantron so a man fadon flaw go na wan sei.

Ala sma kon skreki. A man fesi weti so leki wan laken. Den denki taki a dede kba. Den taki: ‘Go teki watra.’ A embre di ben abi a pet'watra di a man ben dringi, a dati den teki, nati a man fesi. Den figi en fesi, den nati en skin. So a man kisi ensrefi baka. Dan den alamala go sidon na a tafra baka. Ma a man di

[p. 8]

[p. 9]

ben kon prei nanga den, no ben de moro, a ben gwe. Den no si pe a go.

Ne wan foe den aksi en: ‘San psa? Fa joe firi? Joe no njan? San psa? Joe dringi sopi, dan joe no njan?’

A taki: ‘No, joe sabi san ben meki mi skreki so? Joe sabi nanga soema oen prei karta dineti? Oen ben prei nanga Didibri. Di a karta fadon, dan mi si en foetoe. Na bokoboko foetoe a abi. So mi sabi taki nanga Didibri oen prei. A foe dati meki en wawan ben wini. Bikasi soema prei nanga Didibri, a sa lasi nomonomo. Was' na moni, was' na joe sili, was' san, soema e prei nanga Didibri soso lasi a sa lasi.’

Dan den man no prei moro na ini a koleisi dati. Den skreki sote dati den go na wan tra koleisi go prei. Ma den no ben go prei moro na Mis' Griki Koleisi. Ooktoe den no ben prei te so lati neti moro, bikasi den frede taki Didibri kan kon drape toe.

So den sma di e jere a tori disi mi e begi den: oen no prei karta srefsrefi. Ma efoe oen e prei karta, oen no prei foe go bedrigi trawan. Bikasi na dati den man ben wani doe. Den ben wani bedrigi a man di kon. Ma den no ben kan doe dati, bikasi den si taki Didibri ben tranga moro den alamala.

Te so fara a tori disi.