3 Anansi tori

[p. 28]

Anansi na angriten

Na ini a kondre pe Anansi ben libi, wan bigi angri ben broko, bikasi bigi watra ben kon. A baka dati tranga drei ben kon. So ala njanjan kon pori na gron. Ksaba nanga ptata pori. Ala banabon ben fadon. Njanjan no ben de.

A ben de so lek' fa a ben de na ini a ten foe Josef. Egypte ben abi njanjan, ma den tra kondre no ben abi. Dan den sma ben go bai njanjan na Egypte. A tori dati, foe Josef, de na ini Bijbel foe leisi.

Na ini a Anansi tori disi, a kownoe ben abi wan hebi nen. A no ben gridi. Ma a ben abi wan tra sani. A taki: ‘Ala sma di kan kon wroko, kan kon teki njanjan. Den kan kon teki ksaba, den kan kon piki ptata. Den kan kon kapoe bana. Ma fosi den gwe den moe taigi mi fa mi nen. Efoe joe no sabi a nen, joe moe libi ala den sani, di joe ben poeroe na ini a gron.’

Anansi kari Akoeba. A taki: ‘Jere, wi o go na a kondre foe jere a kownoe nen. Ma joe moe jepi mi. Joe e weri wan pisdoekoe gi mi. Dan joe e poti wan pikin

[p. 29]

batra papa na mi sei na ini wan baskita, pe mi e go didon. A krosi moe foeroe so dati a kownoe no kan si fa mi bigi. Joe ferstan? Dan joe e teki joe bigi baskita, poti someni njanjan leki joe kan tjari. Efoe joe no man tjari en, joe e srepi en kon. Mi sa jepi joe bakaten. Dan mi e go proeberi foe jere fa a kownoe nen.’

Akoeba taki: ‘A boen.’

[p. 30]

Tamara mamanten froekoe, fosi son opo, en nanga Anansi go na pasi. Anansi ben waka nanga a pikin baskita. Ma di den de krosbei foe kisi a kondre, Akoeba weri a pisdoekoe gi en, poti en na ini a pikin baskita, tjari en go.

A taki: ‘Mi kownoe, mi kon begi joe. Mi no kan poeroe wan pikin njanjan na joe gron?’

Kownoe taki: ‘Seker, joe kan kon, mi goedoe. Ma prakseri boen. Efoe joe no sabi a nen, joe moe libi ala a njanjan di joe poeroe.’

Akoeba taki: ‘Mi sabi dati, mi kownoe. Mi sa rai. Sonte mi kan feni en.’ Akoeba taki moro fara: ‘Mi kownoe, mi abi wan pikin boi djaso. Na pikin boi disi, mi no abi no wan sma foe libi en. A abi wan neigi moen so. Mi no kan libi en wanwan na oso. Mi no abi no wan sma. Mi e begi joe, mi kownoe, mi kan poti en na wan sei djaso? Mi e poti wan batra papa gi en. Efoe ai kreikrei, joe kan gi en. Dan a sa tan tiri.’

[p. 31]

Brekten joeroe, Anansi bigin kreikrei kreikrei. Kownoe gi en a papa.

Ma Akoeba e piki njanjan. Tra man jepi en, jepi en, jepi en te bakadina. Son e go dongo, son e go saka. Dan a doro baka na kownoe oso.

Di Anansi kba njan a papa, a kleine wan bigi kleine. A eri pisdoekoe di a weri nati petepete. Dan a bigin bari. A opo wan bigi sten.

Te wan baby nati, joe moe weri wan tra krin pisdoekoe gi en. A kownoe no ben

[p. 32]

sabi den sani dati. A no abi pasensi toe. A taki: ‘San joe e bari so dan?’ Kownoe go loekoe na baskita. Kownoe taki: ‘San e go miti mi, Kongodifa. Wan pikin boi foe wantoe moen, di kleine so wan bigi kleine! Pe ala a watra kmopo? A no kan de na ini joe bere wawan! Ai, mi Kongodifa, san e miti mi tide?’ So Anansi kon jere a nen.

Di Akoeba kon baka nanga a baskita, Kownoe taki: ‘A boi meki babari, jèrè.’

A mama taki: ‘Ai, mi kownoe. Tje, a boi stowtoe, no?’

[p. 33]

Kownoe taki: ‘A ben switi ma a plasje. A kleine wan kleine djaso gi mi. Mi no sabi san mi ben moe doe. Mi no fasi en, jèrè, mi no fasi en.’

Akoeba taki: ‘Mi kownoe, mi sa tjari en gwe, bika mi no tjari noti kon foe weri gi en. Mi e go opo en so nanga a watra.’

Kownoe taki: ‘Ija, ma joe no kan teki a baskita nanga a njanjan. Joe moe taigi mi fosi, fa mi nen.’

A taki: ‘Kownoe, na wan hebi nen?’ Kownoe taki: ‘Mi no sabi.’

‘Na wan makriki nen? Nanga sortoe letter a nen e bigin?’

Kownoe taki: ‘Nono, dati mi no kan taigi joe.’

Akoeba taki: ‘We, mi e bigin rai. Kownoe no sa nen Anansi, bika mi masra nen Anansi.’

Kownoe taki: ‘Na wan lawlaw nen. No, mi no nen so. ‘

‘Kownoe, joe nen Wan?’

Kownoe lafoe.

[p. 34]

‘Joe nen Weri? Joe nen Kwakoe? Joe nen Kofi?... Akoeba taki: ‘Kownoe, wan leisi mi jere wan Anansi tori, wan tori wan sma ben ferteri. Na ini a tori dati, a kownoe ben nen...’

Kownoe taki: ‘Ai, kari kon.’

‘A kownoe ben nen, “Kownoe Kongodifa.”’

Kownoe taki: ‘San! Fa joe doe sabi a nen? Na mi nen dati ja, Kongodifa.’

Akoeba taki: ‘Ai, Kongodifa, na so Kownoe nen.’ Bikasi Anansi ben taigi en

[p. 35]

safri na en jesi di a kon, ‘Kongodifa.’ Akoeba ben jere en foe Anansi.

A kownoe taki: ‘We, a boen. Joe rai a nen. Joe no moe ferteri no wan enkri tra sma. Dan joe kan go na oso nanga joe baskita nanga joe njanjan. Wan tra dei, joe kan kon teki baka, ma joe no moe tjari a boi disi kon moro.’

Di den doro baka-oekoe, den kenki. Anansi teki a hebi baskita nanga njanjan. Den lafoe sote.

Anansi ben abi njanjan bijna a eri moen. So langa angriten ben de, Akoeba ben kan go teki njanjan na Kownoe Kongodifa gron. Anansi jepi ensrefi poeroe na ini moelijkheid.

Anansi moe de!