3 Anansi tori

[p. 18]

Fa Anansi poeroe monki na nowtoe

Na Anansi tori disi e leri oen fa oen moe libi nanga makandra. A sani ben psa so. Joe sabi taki Tigri na wan bigi meti. Anansi na wan pikin meti. Monki na wan pikin meti toe. Ma joe sabi taki Monki kan meki bigi trobi kon, nanga aladi a no bigi.

Wan dei di den boes'meti sidon e taki tori, Monki taki: ‘A boi Tigri, ak, mi no wani jere noti. Ai skepi leki san. Tigri

[p. 19]

no warti neks, bigi foe soso. Mi dati no frede foe Tigri, jèrè. Efoe Tigri opo en bigi mofo, leki ai go swari joe, joe sa frede. Ma no mi, Monki no! Mi e djompo na Tigri baka lek' neks. Mi e rei en lek' fa mi wani.’

Ma so leki fa a de na mindri libisma, so a de nanga meti toe. Konkroe de alaten na ala sei. Wantoe meti go ferteri Tigri san Monki taki, dati ai go rei Tigri.

[p. 20]

Tigri ati bron, a bigin bari nanga en bigi stem: ‘grrrrrrrrrrrr! Na so Monki taki? A boen, mi o sori en. A kba foe libi. A no sa tan moro na ini a boesi disi. No wan enkri monki no e tan moro na ini a boesi. Mi sa kiri den alamala. Ma fa?’ Tigri go na en mati Anansi, go teki rai.

Anansi taki: ‘We, mi mati, jere. Joe sabi pe joe moe go? Mi no kan gi rai so boen. Joe moe go na Konkoni. A no langa di Konkoni kmopo na wan boen hei skoro, di den kari Universiteit. A kisi wan boen bigi papira. A abi a moro hei punt foe

[p. 21]

afkati. Konkoni tron afkati. A koni srefsrefi. Na en joe moe go. Ai go taigi joe san joe moe doe. Ma, joe moe pai en wan pikin moni, bika joe sabi taki joe no kan kisi afkatiwroko foe soso.’ Tigri go, a waka.

A waka, a waka te a feni Konkoni. A ferteri en a tori. Konkoni taki: ‘We jere mi rai. Joe moe gi wan boen bigi fesa. Njanjan nanga dringi moe de foe naki dagoe (foeroe). Ala meti joe e kari. Seni

[p. 22]

karta go kari den taki Tigri e gi fesa. Alamala moe kon na a fesa. Dansi sa de toe, nanga moi pokoe.

Joe sabi sortoe band joe moe joeroe foe prei moi switi pokoe? A band foe Anansi. Dape na ini a band foe Anansi, joe abi Doksi, joe abi Kwakwa, joe abi Todo. Joe abi Fowroe toe nanga wantoe trawan moro so leki Boeriki. Efoe den man dati kon, no lasi ati. So moi no de. Dan Anansi dati e naki a dron. Anansi na dronman.

A pokoe switi srefsrefi. Te a kon faja, dan joe waka saf'safri go na sodro. Joe sroto a doro, ma a fensre dati moe tan opo, bika noso ai go waran toemsi. Dan joe e opo na loiki na sodro. Drape joe e go si fa Monki lobi dansi! Te Monki e poko na ondro a loiki, dan a ten kon. Dan joe e djompo, joe e graboe en. A no kan go no wan enkri presi.’

‘Ai,’ Tigri taki: ‘Dati na wan boen rai. Mi sa doe lek' fa joe taki.’ Tigri seni kari ala meti: sowan dei, sowan dei, bigi fesa e go de. No wan man moe tan na oso. Tigri taki: ‘Monki taigi oenoe taki

[p. 23]

mi, Tigri, mi na bigi foe soso! Mi kari en toe, meki mi kan dansi nanga en. Mi e go opo a dansi nanga en.’

We a sani waka so toe. Di ala den meti kon, dan a band prei wan wals:

‘San j'e loekoe mi. San j'e waki mi.
M'ja no paarderij. M'ja no pajasiman.
San j'e loekoe mi. San j'e waki mi.
M'ja no paarderij pajasiman.

Ai! Den sma e swing, so wan moi wals. A baka dati wantoe moi stuk prei ete.

[p. 24]

Ma di lati e kon, den man drai anoe, a pokoe kon faja, a kon hot. Den naki kawna now. Anansi e naki a dron dati en skin e lon watra.

Anansi bigin singi:

Monki loek'a sodro loek'a gron monki (2x)
Alwas a doro sroto a fensre opo joe kan lon
Monki loek'a sodro loek'a gron mon -

[p. 25]

Monki taki: ‘Dati wan lawlaw singi Anansi e singi, jèrè. Ma a singi gersi wan boskopoe. “Monki loekoe a sodro, loekoe a gron.”’ A joeroeten Monki opo en ai, a si Tigri na loiki. Tigri ben de so foe djompo.

Monki taki: ‘Ahhhhh! Na dati Anansi ben wani taki nanga a singi. A taki a doro sroto ma a fensre opo, mi kan lon.’ Dan Monki lon psa a fensre.

[p. 26]

Tigri naki ala dansiman na wan sei, bri, bra, broe, foe lon kisi Monki.

Ma Monki ben de kba te na a moro hei taki foe a moro hei bon. Tigri no man kisi en, bika Tigri no man kren den sortoe bon disi.

Monki big in dreigi: ‘Efoe joe man, kren kon no!’ Tigri no man.

En na so, te tide na feanti de na mindri Tigri nanga Monki. Noiti noiti freide sa kon nanga den toe disi. Te Monki si Tigri, a sa kren go na ini wan bon, bika Tigri wani kiri en.

Ma joe si Anansi ben de wan mati foe Monki. Dati meki a ben warskow en, a jepi poeroe en na nowtoe. Na so a moes de nanga troetroe mati.

[p. 27]