Het Brussels moeselken

[p. 129]

Beklagh van Thyrsis, en Cloris.

Stemme. Amour tu me faict trop souffriri. &c.

Myn liefst Cloris niet soo wreet,        Bis.
Ick en ded' u toch, noyt gheen leet,
Dat ghy my scheynt te haeten,
Liefste wilt toch deês wreetheydt laeten.        Bis.

2. Thyrsis 'ten is gheen straf ghemoet,        Bis.

'tWelck my van u verwalghen doet,
Het zyn u eyghen daeden,
Dat ghy myn gunste wilt versmaeden.        Bis.

3. U gunst en heb ick noyt veracht,        Bis.

Maer t'uwen dienst al-tydt ghetracht,

[p. 130]

 

Scheen ick u te ontvlieden,

 

'kSal u te meerder eer gaen bieden.        Bis.

 

4. Van 'tgheen men mint, en gheren siet,        Bis.

 

En vlucht-men, oft en schouwt-men niet,

 

Waer't ghy strantvast ghebleven,

 

Ghy sout noch in myn liefde leven.        Bis.

 

5. Heb ick van u my wat vervremt,        Bis.

 

'kBid' u dat ghy't ten besten nemt,

 

Naer buyen, en stuer weder,

 

Keert de Son al-tydt klaerder weder.        Bis.

 

6. 'kSweir u dan liefste boven al.        Bis.

 

Dat ick u noyt verlaeten sal,

 

Maer tot ter doodt sal eeren,

 

En dat ghy 'tsuer in't suet sult keeren.        Bis.