Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio M6v]
| |
nae de wijse: O Menschen excelent, &c.O Syoen Bruyt valiant,
Vol schoonheyt triumphant,
Een costelijc cieraet,
Ghy onsteeckt my met brant,
Der liefden abondant,
O reyn maechdelick saet,
Die't al te boven gaet,
Syt ghy O Bruyt eerbaer,
Blijft by my totter doot,
Ick sal u hemels Broot,
Schencken voor een nieu Jaer.
In desen nieuwen tijt,
My doch ghetrauwe zijt,
O Edel suyuer Jeucht,
Al wort ghy hier benijt,
Ghy sult noch met Jolijt,
By my wesen verheucht,
Veel melodye en vreucht,
Sult ghy be-erven daer,
Ende den nieuwen wijn,
Sal ick u Bruyt devijn,
Schencken voor een nieu Jaer.
Ick heb u Lief bemint,
Als een moeder haer kint,
Eer s'werelts gront gheleyt,
Was, heb ick u versint,
Siet toe dat ghy verwint,
V Lief vol eerbaerheyt,
Soo sult ghy zijn ghecleyt,
Met witte Sijde claer,
| |
[Folio M7r]
| |
En die eewighe Croon,
Sal ick tot uwen loon,
Schencken voor een nieu Jaer.
Reyn uytvercooren spruyt,
Aenhoort mijn soet gheluyt,
O Edel schoone maecht,
Laet gaen in u conduyt,
Brengt vreuchten vol virtuyt.
En my goe ionste draecht,
Alleen ghy my behaecht,
Schoon maechdelick Pijlaer,
Ick sal u lief constant,
Al mijn goeden playsant,
Schencken voor een nieu Jaer.
O mijn vriendinne soet,
Jonstighe minne goet,
Draech ick sonder afkeer,
V deur der liefden gloet,
Schanck ick mijn roode Bloet,
Voor u O Maghet teer,
Om u uyt s'doots verseer,
Ter verlosser voor waer,
Blijft vroom Bruydeken ient,
Ick sal vreucht sonder ent,
Schencken voor een nieu Jaer.
O Bruyt hout goede wacht,
En wandelt wijs bedacht,
In dees bosschage wilt,
Doch nu vroylick lacht,
Voor u torment onsacht,
Bring ick u gagie milt,
Dus met coragie stilt,
| |
[Folio M7v]
| |
Des vyants pijlen swaer,
Ick sal u sonder afscheen,
Levende water reen,
Schencken voor een nieu Jaer.
Dee's beloften lopael,
Sal ick u generael,
Hauden vry onghesneeft,
Want ghy Lief liberael,
Behaecht my principael,
Boven al wat hier leeft,
My doch altijt aencleeft,
In druck en lyden swaer,
Sal ick u zijn omtrent,
Mijnen geest tot present,
Schencken voor een nieu Jaer.
Princesse Lief iolijs,
Wel schoon ghebloyet rijs.
Mijnen sin algheheel,
Stel ick aen u propijs,
Ick sal u tot een prijs,
Schencken voor een erfdeel,
In des Hemels pryeel,
Sult ghy mijn wederpaer,
Wesen sonder verlanc,
O Bruyt neempt dit in danck,
Den sanck voor een nieu Jaer.
Die op Godt betraut,
Sijn gheluck is menich-faut.
☞ ☜ |
|