Sommighe nieuwe schriftuerelicke liedekens
(1599)–Frans vander Straten de jongere–
AuteursrechtvrijNae de wijse: Een Liet wil ick gaen singhen dit wel gedachtich zijt.O Joncxken ionck van jaren,
Schickt u naer s'Heeren woort,
En laet de jonckheyt varen,
Gaet in Gods vreese voort,
Begeert oock net in u gebedt,
Dat God u bystant doet,
Hy sal u wel bewaren,
Valt hem also te voet.
Begeeft u ionghe leden,
Tot die gherechticheyt,
En wilt met wijse zeden,
Aendoen het bruylofs cleyt,
Treckt soo vermaert ter bruyloft waert,
De poorte open staet,
Wilter doch door treeden,
Eert sal wesen te laet.
Al door die poorte nauwe,
Gaet so Christus gebiet,
En geeft hem uwe trauwe,
Hoe wel ghy noch ionck zijt,
Zijn goeden fijn sullen u zijn,
Hoe rijcke wert ghy dan,
Ghy wert ooc zijn huysvrauwe,
En Christus uwen man,
| |
[Folio M5v]
| |
In Jeremias clagen,
Daer staet met goet bescheydt,
Dat goet is datmen drage,
Het Jock van ioncx op geleydt,
Daeromme als ghyt op den hals,
Wilt nemen om te gaen,
Ghy muecht niet wesen trage,
Noch nieuwers stille staen,
Gaet altijts rechte deure,
En kijckt doch nieuwers naer,
En volcht Den herder peure,
Dat ghy meucht comen daer,
Wel dapper tert eert duyster wert,
En wilt doch rusten net,
Wy en weeten tijt noch ure,
Al naer des schrifs bediet,
Wy sullent al wel maken,
Dat segge ic u gewis,
Connen wy daer geraken,
Eer die poorte toe is,
Olie nat doet in u vat,
Christus also verwacht,
Wilt bidden ende waken,
En slaept noch dach noch nacht,
O spruytgen ionc seer coene,
Ghy die noch melcxken zoocht,
Blijft altijt euen groene,
Dat ghy nieten verdroocht,
En danckt den Heer dat hy zijn leer,
V heeft geopenbaert,
Pijnt u daer naer te doene,
Dat ghyse wel bewaert,
| |
[Folio M6r]
| |
Stelt alle quaet besyden,
Dat is Paulus les,
En wilt u oock besnyden,
Met t'geestelicke mes,
Op dat ghy fier mocht comen hier,
In s'Heeren huys vol vreucht,
En ghy daer met verblyden,
Oock altijts blyven meucht.
Sy dienen al besneden,
Die wijsen comen saen,
In s'Heeren huys vol vreden,
Naer schrifturen vermaen,
Dus wascht u reyn in die fonteyn,
Het suyre deech uyt vaecht,
Op dat ghy hoort mijn reden,
Vwen man wel behaecht.
Hier mede wil ick uytten,
Mijn simpel ghesanc,
En seggen ten besluyte,
Nemet van my in danc,
Al is den dicht simpel en slecht,
Ick ben oock jonck en onwijs,
Oorlof ionge spruyte,
Geeft Godt van al den prijs.
Door M. D. C.
Silver en Gaut, al wat men aenschaut,
in s Werelts hoven,
De rechte waerheyt, daer men veel afseyt,
gaetet al te boven.
☞ ☜ |
|