Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijop de wijse Van den Psalm Davids: Salich is hy bevonden, &c.Ghenade ende vrede,
Mijn lieue suster soet,
En s hemels ghesinthede,
Wensche Ick u voor een groet,
Dat ghy daer door meucht smaken,
Altijt wat hemels is,
En u wel bereyt maken,
Om daer te comen fris.
Om daer eens te gheraken,
So moeten wy met vliet,
Neerstich bidden en waken,
Also Christus ghebiet,
Den Heere van herten vreesen,
Mijden der sonden stanck,
Ende goet doen ghepreesen,
Alle ons leven lanck.
Alsoo langhe als wy leven,
Moeten wy hier devijn,
Den heere vast ancleven,
En hem ghehoorsaem sijn,
Ons selven heel versaken,
Ende te buyten gaen,
Ons lichaem suyver maken,
Van al dat streckt tot quaen,
| |
[Folio H7v]
| |
Reynicht u mijn beminde,
Suster al in den Heer,
Als die wijse ghesinde,
Al tijt meer ende meer,
Neempt getrauwelick waer,
V beroepinghe jdoon,
Soo sult ghy hier naer,
Ontfaen d'eewighe Croon.
Verciert u' O Bruyt vercooren,
Des Lams seer excelent,
In deucht na den behooren,
Wast op tot inden ent,
Die liefde laet niet vercauden,
Maer wilt vierich voort gaen,
Op dat ghy meucht behauden,
t'Gheen dat ghy hebt ontfaen.
Wilt ghetrauwe bewaren,
Dien costelicken schat,
Die ghy (hoort mijn verclaren)
Hebt in het aerden Vat,
Ontfanghen vanden Heere,
Door zijn liefde minioot,
Houdt hem in grooter eere,
Al tijts tot inde doot.
In dien ghy hebt beginnen,
Dus vierich inden gheest,
Wilt met herten en sinnen,
Daer in wandelen meest,
Hebt Godt altijt voor ooghen,
Ende int herte me,
En wilt u neerstich pooghen,
Nae die hemelsche Ste.
| |
[Folio H8r]
| |
Int voor nemen wilt niet verflauwen,
Inden gheest vierich zijt,
Int gebet wilt niet op hauwen,
Schickt u al na den tijt,
Weest vroolick inder hoopen,
Verduldich in druck en arbeyt,
En wilt gheduldich loopen,
Inden strijt die ons vooren leyt.
Treckt cloeckelick ten strijde,
Al met het Sweert des geest,
Verwint tot allen tijden,
En weest doch niet bevreest,
Neempt Gods Harnas vol eeren,
Haut alsoo goede wacht,
Om t'quaet van t'Huys te weeren,
Neerstelick sorghe draecht.
Den Tempele jdoone,
Soo die Schrift allciert,
Moet suyver zijn en schoone,
Daer Godts gheest in logiert,
Laet ons om ons beclyven,
Ons selven nemen waer,
Dat Godts gheest in ons blyven,
Mach en woonen al daer.
Des Heeren gheest bequame,
Wensch ick u beyde hier,
Mijn suster Seyntghen met name
Met uwen man goedertier,
Wilt mijn simpel ghedichte,
Wt liefden doch ghedaen,
En beghere al ist slichte,
Bidt ick in danck ontfaen.
| |
[Folio H8v]
| |
Hier mede wil ick enden,
Mijn simpel ghesanck,
Willet int goede wenden,
Reyne liefde my dwanck,
Wilt my altijt ghedencken,
In u ghebet tot Godt,
My dat tot hulpe schencken,
Bidt ick voor een slodt.
Adieu Suster bequame,
Adieu myn vrinden al,
Wandelt int licht eersame,
Hier in dit duyster dal,
Hier mede wil ick scheyden,
Wt dit simpel ghesanck,
Godts Geest wil u gheleyden,
En stieren uwe ganck.
|
|