Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijop de wijse: O Heer der Heerscharen.GHenade vrede te samen,
Sy by u tot elcken keer,
Mijn broeders naer den betamen,
Ende mijn susters inden Heer,
Wandelt op des Heeren weghen,
Hier in dit ertsche pleyn,
Wilt Christum volgen ter deghen,
En vreest storm hagel noch reghen,
Maer fondeert u op den rechten steyn.
Een steen daer wy af spreken,
Dat is Christus den hoecsteen hoort
Die wiert van de lieden versteken,
Ende verworpen verstaet mijn woort,
Maer wy gheloovige gronden,
Is hy wtvercoren en goet,
| |
[Folio H4v]
| |
En verlaet hem tot gheen stonden,
Op dat wy niet worden bevonden,
Gelijc de dwase maechden onvroet.
Maer laet ons gelijcken verheven,
Die andere vijf Maechden wijs,
Soo mogen wy eeuwich leven,
En by Godt commen int Paradijs,
In die hemelsche Stede,
Daer eeuwighe vreucht sal zijn,
Dus laet ons wandelen in vrede,
Mijn Broeders en Susters mede,
Soo werden wy salich t'allen termijn
Wilt naer de vrede haken,
Hoort wat ons Christus heeft geseyt
Salich zijn die de vrede maken,
Mattheus int vijfde ist uyt geleyt,
Wandelt in vrede coene,
Ghelijc ghy gheroepen zijt,
Soo mocht ghy t'allen saysoene,
Op den berch al van spoene,
t'Nieuwe liet singen en zijn verblijt.
t'Nieuwe liet sullen sy singen,
Ende in vreuchden wesen siet,
Als gemeste Calveren springen,
Soo Malachias int vierde bediet,
Naer dat staet mijn verlanghen,
Vrinden hoort dit besluyt,
Wilt hem t'allen tijden aenhanghen,
Christus sal u ontfanghen,
Al voor zijn Dochter en lieve bruyt.
Och Bruyt Christi ende Gemeente,
Wilt doch volghen uwen Man,
| |
[Folio H5r]
| |
Die als vleesch en been zijt van Christus ghebeente,
Houdt vast tot ten eynde aen,
Tis wel om te beclaghen,
Dat Godts volck soo seer verstoort,
In dese laetste daghen,
Sietmen de lieden vertraghen,
Al om te gane door d'enge poort.
Den wech is enge en nauwe,
Die wy moeten treden hier,
Weynich zijnder die daer opbauwen
Maer soecken al den ruymen wech schier,
Die daer leyt totter hellen,
O menschen wilt wel toe sien,
Eer dat dien dach u compt quellen,
Daer die Propheten ons af vermellen
Dat ghy Godts toorne doen meucht ontvlien
Wilt nu ontvlieden Gods tooren,
Dat ghy meucht hooren seer playsant
Compt hier mijn uytvercooren,
Besidt mijn rijcke seer tryumphant,
Twelck u tot alder uren,
Van eeuwighe tijden is bereyt,
Dan sal ghedaen zijn ons treuren,
Veel vreucht sal ons ghebeuren,
Als wy ontfangen het witte cleyt.
Oorlof broeders en susters generalich
Maeckt dat u daet Christelic blijckt
Wilt ghy lieden oock werden salich,
Geensins van desen steen en wijckt,
Daer ick oock van verhale,
Int eerste en twede vers ist vervaet,
Dus Broeders princepale,
| |
[Folio H5v]
| |
En susters alle te male,
Bidt voor my Godt vroech ende laet.
☞ ☜ |
|