Sommighe nieuwe schriftuerelicke liedekens

Een Nieu Liedeken

op de wijse
Alsoment singt.

GOd verleene u pays neeringe en vrede,
O bruydegom seer valliant,
Met u vrau bruyt ende al tgheselschap mede,
Godts geest wil u doen onderstant,
Want godt heeft desen staet seer triumphant,
Ingestelt voor veele tijden,
Om dat wy ons voor den boosen vyant,
In desen staet souden bevryden,
Soomen u toogen sal met een verblijden,

[fol. H3v]

 

God maecte den mensche eerst al van erde,

 

Ende hy gaf hem een mede hulpe Jent,

 

Soo genesis getuycht als experde,

 

Als twee sielen tot een lichaem inden ent,

 

Daerom sullen sy seer obedient,

 

Vader en moeder verlaten,

 

Om den staet des huwelicx seer excelent,

 

t'Onder houden tot haer luyder bate,

 

Want het is een staet boven alle staten.

 

Godt heeft den staet vereert, verheuen,

 

Soo wy vinden in die schriftuere claer,

 

Tot eener in gelicke beseven,

 

Daer hy van water win maecte voorwaer,

 

Zacharias traude int open baer,

 

Elisabeth goeder tierich,

 

Jacob diende langhe met pijne swaer,

 

Labam om zijn dochter cierich,

 

Om te vermeeren, desen staet, seer vierich.

 

Tobias heeft desen staet willen vermeeren,

 

Hy vercreech door den enghel een huysvrouwe goet

 

Dauidt ende Abigel sonder verseeren,

 

Jochem ende Anna leefden vroet,

 

Joseph met Maria Gods moeder soet,

 

Abram al met Sara bevonden,

 

Hy trock wt zijn lant met groot tegen spoet,

 

Christus voor zijn bruyt tot allen stonden,

 

Heeft doot helle ende vyant verslonden.

 

Hier om laet ons altijt bidden en waken,

 

En maken ons den ouden Adam quijt,

 

Dat wy tot Cristus bruyloft geraken,

 

Als hy daer trauwen sal met jolyt,

 

De dochter Syon gebenedijt,

[fol. H4r]

 

Sijn lief zijn bruyt sin coninginne schoone,

 

Bereyt u bruylofs cleet tis meer dan tijt,

 

Want hy bereyt staet in persone,

 

Om u t'onfangen in des hemels troone.

 

Oorlof hier mede laet danckelick wesen,

 

Voor ons Jongers op dit termijn,

 

Bruydegom ende vrau-bruyt gepresen,

 

Wilt vromelick te samen trecken een lijn,

 

Tegent serpent schiet syn fenijn,

 

Sullen u vruchten al beclyven,

 

Aen u tafel sullen sy sitten fijn,

 

Int' getal als planten van olijven,

 

Soo ons de Propheet heeft willen beschrijven.

   ☞   ☜