Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio G5v]
| |
na die wijse: Babel is nu ghevallen, &c.GHepeyns en swaer doleuren,
Dat doet my groot verdriet,
Dat ick aldus moet treuren,
Dat en compt anders niet,
Dan om dat ick nu moet derven,
t'Geselschap alle gaer,
Godt wil ons weder brenghen,
By een int nieuwe Jaer.
Maer nu moeten wy scheyden,
Al ist nu grooten druck,
Den Heere wil u gheleyden,
En gheven u veel gheluck,
Ghenade en vree, en liefde mee,
Van God den hemelschen vaer,
Die wil ons t'samen weyden,
Al in dit nieuwe Jaer.
Vwe Pelgremagie reene,
Met suchten ende weent,
Toont dat ghy zijt de gheene,
Die Godt van herten meent,
Al zijt ghy onvroet, veel tegen-spoet
Staet vroom als een pijlaer,
Godt cant weder verleenen,
Al in dit nieuwe Jaer.
Blijft int gheloove crachtich,
Sterck al inder liefden soet,
Och weest my doch ghedachtich,
Voor Godt met groot ootmoet.
In u ghebet, doch altemet,
Als voor Godts schuldenaer,
| |
[Folio G6r]
| |
Soo werd' ick u ghedachtich,
Al in dit nieuwe Jaer.
Laet ons somtijts ghedincken,
Of wy voor Godt recht staen,
Op dat wy niet en smeken,
Stant hoochmoedich belaen,
Hoochmoedich geschal, compt voor den val,
Och vrienden nemet waer,
En wilt gheen tweesins hincken,
Al in dit nieuwe Jaer.
Wilt vromelick door ganghen,
Wilt inden Geest verblyen,
Al vallet u dickmaels banghe,
Wilt doch in tijts toesien,
Dat u niemant, met geen samblant,
En make wandelbaer,
Maer wilt doch stijf aenhangen,
Al in dit nieuwe Jaer.
Staet int gheloove crachtich,
Sterck inder liefden coen,
Soo weten wy voordachtich,
Wat Godt met ons wilt doen,
Ick weet dat staet, by zijnen raet,
Och wy arm sondaer,
O Godt weest ons gedachtich,
Al in dit nieuwe Jaer.
O Heere wilt ons bewaren,
Als wy nu van hier scheen,
Wie weet waer ick sal varen,
Meer dan de Heere alleen,
Ghedenckt doch my, dat bid ic dy,
In u ghebeden clear,
| |
[Folio G6v]
| |
Op dat wy weder vergaeren.
Als in dit nieuwe Jaer.
Eer dat wy scheyden moeten,
Van broeders en susters mede,
Soo wil ick u tsamen groeten,
Al met des heeren vrede,
Met groot ootmoet, het beste doet,
En vreest toch niet een haer,
Maer doet oprechte boet,
Al In dit nieuwe Jaer,
Wy hebben ghesproken t'samen,
Wt liefden van gods woordt,
Nu singhen wy naert betamen,
Oorlof soo het wel behoort
Vrienden gemeen, wy moeten scheen,
Adieu mijn liefste Caer,
En wilt u het woort niet schamen,
Al In dit nieuwe Jaer,
Oorlof al in dit scheyden,
Soo beveel ick u den Heer,
Laet het woort door u verbreyden,
Dat bidt ick u alsoo seer,
Nu segge ick adieu, tot op een nieu,
het scheyden valt my swaer,
Den Heer wil u gheleyden,
Al in dit nieuwe Jaer.
Verheucht in deucht,
☞ ☜ |
|