Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijna de wijse: Vlaenderlant, Edel landauwe zoet, &c.EEn is alleen // my reen // duyve mijniot,
Hier geacht cleen // maer geen, voor mijn so groot
Sterck als de doot // is liefde stranck,
Ick was ter noot // van minnen cranck,
Als Ick u schanck // den dranck // seer excelent,
Schoone bruyt jent // bekent // blust mijn verlanck
Den ganck te my waerts went.
Schoon ongelaect // volmaect // is mijnen man
Mijn herte waeckt // en blaeckt // in liefden dan
Ghy dochters van Jerusalem,
| |
[Folio G1v]
| |
Spreeckt mijn lief an, en segget hem
O lief u stem, seer tem,
Maeckt my verheucht,
Gheeft my cracht deucht, en Jeucht,
Dat ick op clem, niet strem,
By u in vreucht.
Thoont my dijn, aenschijn, vriendinne goet
V borsten zijn, als wijn, liefelijck soet,
Der liefden gloet, heeft groot virtuyt,
Gheen water vloet, en blust haer uyt
Compt uyt dat ruyt, besluyt,
Der Leeuwen wreet,
Doet aen u Cleet, bereet,
Maeckt u Reyn spruyt, mijn bruyt,
Vyt liefden heet.
Mijn wangen vocht, u socht, ic lief mynaer
Och oft'se mocht, ontknocht, van lijden swaer
Vry Cussen daer buyten versint,
V die eenpaer, mijn siele bemint,
Want als dit kint, begint,
Te baren wel,
De pijne is fel, maer snel,
By u troost vint, men int,
Cruyse en ghequel,
Heft op u hooft, gelooft, mijn woort Idoon
Siet dat verdooft, berooft, niemant u croon,
In mijnen throon, wert ghebracht,
Tis daer soo schoon, van my ghewracht
Noyt ooghe en sacht, dus lacht,
Inwendich meest,
In dit foreest, dat beest,
Met zijn gheslacht, en macht,
| |
[Folio G2r]
| |
Doch niet en vreest.
Mijn bruydegom, mijnrom, zijt ghy altijt
Mijn eyghendom, daerom, wort ick benijt,
Maer inden strijt, doet my bystant,
Breet ende wijt u stercke hant,
Men vint int lant, niemant,
Ghetrauwe als ghy,
Dus blijf ick by u vry,
Vast ingheplant, jae want,
Twee een zijn wy.
Princesse saen, vergaen, sal u verdriet,
Want Elcken traen, afdwaen, sal ick u siet,
En twijffelt niet maer op my baut,
Dat ghy als riet niet en verflaut,
Mijn woort aenschaut, betraut,
Op my ghepast,
Wie u in last // bringhet vast,
Quelt of benaut, seer staut,
Mijn ooghe aentast.
Princelic Heer, wanneer, oordeelt ghy recht
Met valsche leer, men seer, teghen my vecht,
Elck weder secht, my als ghestoort,
Veel listen lecht, die slanghe aenboort,
Maer lief u woort, accoort,
Is een licht vat,
Op mijnen pat, soo dat,
Ick deur die poort, ga voort,
Binnen die stat,
Door: M. D. C. ☞ ☜ |
|