Sommighe nieuwe schriftuerelicke liedekens

[fol. F8r]

Een anders

nae de wijse: Van den Lant-Graaf van Hessen, &c.

Een Liet tot s'Geests verlichten,
Om een dochterken deuijn,
Of sy daer deur mochte stichten,
Ende leeren sedich zijn,
t'Waer wel des Heeren wille,
Waert ghy sedich en stille,
Vader, Moeder ghehoorsaem,
Tot alle deucht bequaem.

Soeckt den Heere te behaghen,

Als een Bruyt reyn u verciert,
Wilt neerstich sorghe draghen,
Dat ghy zijt wel ghemaniert,
Met manieren en goe seden,
En oock met ghehoorsaemheden,
Weest daer mede aenghedaen,
Wilt soo in Gods vreese voortgaen.

Stelt die ydelheyt besyden,

Wilt op Gods woort nemen merck,
Wilt lusten der jonckheyt myden,
Laet oock alle Kinder werck,
En vraecht nae de rechte bane,
Stelt u om daer op te gane,
Vwe Lenden op schort,
En weest met Gods woort omgort.
Laet Gods woort uwen schat wesen,
En daer op seer vaste steunt,
En zijt neerstich om te lesen,
Dat ghy onder scheyden kunt,
Het goet uyt het het quaet gemeene,
Op dat ghy het goet alleene,

[fol. F8v]

 

Meucht volbrengen t'alder stont,

 

Als ghy't onderscheyden cont.

 

Wilt alsoo neerstich arbeyden,

 

In des Heeren woort ghewis,

 

Op dat ghy meucht onderscheyden,

 

Wat des heeren wille is,

 

Wilt u neerstich daer toe poogen,

 

Hebt gods vreese altijts voor oogen,

 

Roept den heere om hulpe an,

 

Hy ist diese u gheven can.

 

God sal u wel wijsheyt geven,

 

Ist dat ghy't van hem begheert,

 

Maer ghy moet zijn woort beleven,

 

En hauden in grooter weert,

 

En bewijsen met de wercken,

 

Dat de menschen meughen mercken

 

Dat alsoo u Licht Rijst,

 

Dat elck Godt daer deur prijst.

 

Als hebdy t'gheloove schoone,

 

Ende de wercken niet,

 

Ghy en sult doch niet te loone,

 

Hebben naer des Schrifts bediet,

 

Maer ghy moet dese twee dinghen,

 

t'Gheloove en de wercken bringen,

 

Want sonder de wercken bloot,

 

Soo is het Gheloove doot.

 

Als ghy tgheloove hebt vercregen

 

Van den heere delicaet,

 

Soo wandelt dan op zijne weghen,

 

Daermen totten leven gaet,

 

Want wilt ghy eewich domineeren,

 

Soo moet ghy dien wech passeeren,

[fol. G1r]

 

Die onsen Capeteyn,

 

Voor en ginck wt liefden Reyn.

 

Hebt dien Capeteyn voor oogen,

 

Die ons vierich voorghinck,

 

Wilt de jonckheyt doen verdroogen,

 

Hebt hem lief voor alle dinck,

 

Stelt aen hem al uwe zinnen,

 

Soo sal hy u oock beminnen,

 

Ghy wert zijn dochter hoort,

 

Soo ghy doet naer sijn woort.

 

Wandelt doch als wijse ghesinde,

 

Vreest de heere voor een slodt,

 

Soo sult ghy wesen de beminde,

 

Vanden Heere uwen Godt,

 

Hier me dencke ick dit te enden,

 

Willet doch int goede wenden,

 

mijn seer Simpel ghesanck,

 

Nemet doch van my in danck.

   Door M. D. C.

   ☞   ☜