Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio F6v]
| |
na de wijse: Mijn droefheyt moet ick claghen, Fortuyne is my gheschiet, &c.EEn Liet wil ick beginnen,
Ende verclaren dat,
Hoe wy met herte en sinnen,
Godt lief hebben ghehat,
Dat wy verstaet dit plat,
Ons overgaven hem,
Om t'commen in die Stat,
t' Nieuwe Jerusalem.
Ten eersten hebt voor ooghen,
Hoe dat ghy eens voor waer,
Vwe knien hebt ghebooghen,
Al voor die waerheyt claer,
En ghy beloofdet daer,
Soo met gheboghen knien,
Vwen Hemelschen Vaer,
Te dienen t allen tien.
Wilt daerom wel ghedincken,
Mijn Broeder delicaet,
Of ghy noch sonder hincken,
Staet in dien selven graet,
Meucht ghy noch seggen jae,
Het is alsoo met my,
Maeckt dat met u soo gae,
V Leven waer dat sy.
Maer u verlichte daghen,
Ghedenckt die onghequelt,
Hoe t'herte was verslaghen,
Des Vleesch lust en ghewelt,
| |
[Folio F7r]
| |
Hoe waert ghy doen ghestelt,
Hoe brande de Liefde doen,
Maeckt datse niet en smelt,
Noch en laetse niet vercoen.
Want ghy waert heel ontsteken,
Al metter liefden brant,
Als ghy eens zijt gheweken,
Al uyt Egypten lant,
Godt nam u by der hant,
En leyde u door die Zee groot,
Dat is dat wy vaylliant,
Verlost zijn deur zijn doot.
Wat een Liefde overvloedich,
Hat ghy als doen ter tijt,
Vernedert en ootmoedich,
En sonder haet en nijt,
Vwer Sielen profijt,
Socht ghy van herten gront,
En socht u te maken quijt.
Dat Gods woort teghen stont.
Al wat Godts woort stont tegen,
Socht ghy te laten jent,
Want ghy waert gantsch genegen,
Tot de waerheyt excellent,
Ja t'herte was ghewent,
Tot den Heere uwen Godt,
Om hier tot inden ent,
Te doen nae zijn ghebot.
Dus wilt den Heere dancken,
En loven vrouch en spae,
Dat ghy zijt van zijn Rancken,
Gheworden deur ghenae,
| |
[Folio F7v]
| |
Hy heeft u ghesleghen gae,
Doen ghy doot laecht ghewont,
Maer deur zijn liefde jae,
Soo maeckte hy u ghesont.
Maer doen hy u verloste,
Vander doot zijt dit vroet,
Silver noch Gaut hem coste,
Maer zijn reyn dierbaer bloet,
Dus danckt hem met ootmoet,
Geeft hem lof, prijs en eer,
Van alle gaven goet,
Die ghy hebt vanden Heer.
Wilt hem loven en prijsen,
Van zijn weldaden fijn,
En hem eer bewijsen,
Van zijn goedtheyt devijn,
Die u hielp uyt ghepijn,
Doen ghy laecht int verdriet,
Want gheen ander medecijn,
En conde u helpen niet.
Looft hem want hy ist weerdich
Hy heeft voor u voldaen,
En blijft hem by volheerdich,
Al sonder af te gaen,
Maer blijft op zijn woort staen,
Siet altijts neerstich toe,
En wilt doch dit vermaen,
Van my nemen int goe.
Door M. D. C.
☞ ☜ |
|