Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijnae de wijse: Gheeft my te drincken na mijnen doorst, &c.DEs Heeren vrede seer delicaet,
Die wensche ick u uyt goeder minne,
Die alle verstant te boven gaet,
Dat oock de selve om u gewinne,
In u herte hout d'overhant binnen,
Dat haer woonste daer mach zijn,
Dat sy beware u herte en sinnen,
Dat is de rechte Jonste mijn.
| |
[Folio E4v]
| |
Al ist dat wy op dit saysoen,
By malcanderen niet en wesen,
Laet liefde daeromme niet vercoen,
Mijn lieve vrienden uytghelesen,
Want sy is vierich t'uwaerts geresen,
Laet ons met desen bant devijn,
Mijn lieve vrienden ghepresen,
Ghebonden gaen waer dat wy zijn.
Al[...]s doch recht inder liefden blijft,
En wandelt daer in hier beneden,
En blijft vast in Christum gelijft,
Wilt buyten zijn verbont niet treden.
Maer wilt u hauden int huys vol vreden,
In gehoorsaemheden totten ende,
Want daer zijn rechten en seden,
Die Christus Leden hebben jent.
Gemaect hebben wy een verbont,
En ons onder die rechten begeven,
Waert dat wy nu t eenigher stont,
Daer tegen deden hier beneven,
Wy souden dan moeten zijn gedreven,
Om onser sonden metter spoet,
Al uyt des Heeren huys verheven,
En eeuwich sneuen, doetmen gheen boet,
Merct eens Saul was gehoorsaem niet,
Maer hy ginck s Heeren ghebot verbreken,
Hy en dede oock niet dat hem Godt hiet,
Maer eylasy hy heeft Godt besweken,
Daeromme is Gods geest van hem geweken,
Eenen bosen quam in hem ras,
En Saul bleef van Godt versteken,
Soo t is gebleken al op dat pas.
| |
[Folio E5r]
| |
Die op Gods gheboden lutter schaft,
En volgen hier haer eyghen ghedachten,
Die sullen wesen van Godt ghestraft,
Als sy t hier minst sullen verwachten,
Hierom mijn vriendekens met crachten,
Haut totten ende toe aen seer stijf,
Op dat wy Saul niet en slachten,
Maer wilt u wachten van sulck bedrijf.
Maer en laet ons sulck bedrijf niet doen,
Maer veel liever in het goede aerbeyden,
Ende alsoo seer stijf aenhoen,
Tot dat wy sullen al van hier scheyden,
Siet wel toe en laet u niet verleyden,
Maer blijft op Godts woort vaste staen,
Want den Satan gaet netten breyden,
En die uytspreyden om ons te vaen,
Daeromme wilt wel zijn stricken mijen,
Dat ghy van hem niet en wort ghevanghen,
Al compt hy ons dach en nacht bestrijen,
Wilt Christum soo veel te meer aen hanghen,
Want ons te vanghen, is zijn verlangen,
Al met verstranghen in zijn Net,
Dus neempt wel acht op uwe gangen,
En wat ghy doet daer wel oplet.
Als de Serpenten voorsichtich soo zijt,
Dat is selfs Christus eygen verclaren,
Want men ist soo haest gheworden quijt,
Daeromme dat men arbeyt veel Jaren,
Dus wilt al u goet wel bewaren,
Dat ghy hier hebt int aerde vat,
Op dat u gheen Roovers en wedervaren,
En sonder sparen nemen uwen schat.
| |
[Folio E5v]
| |
Bewaert toch wel uwen schat voor al,
Mijn lieve vriendekens eenpaerlick,
Denckt dat ghy staet, wacht u voor val,
Want het vallen is seer swaerlick,
In s'Heeren handen, ick secht u waerlick,
Alsoo de schriftuere ghewaecht,
Daeromme segghe ick tot u claerlick,
Dat ghy eerbaerlick sorghe draecht.
Draecht sorghe en hebt seer goet regaert,
Dat ghy niet en loopt t'eenigher uren,
Al buyten Jerusalem vermaert,
Dat ghy daeromme niet en moet treuren,
Siet wel toe latet u niet ghebeuren,
Maer blijft binnen der stadt minioot,
Want om dat Suney liep buyten muren,
Most hyt besuren al metter doot,
Daeromme siet wel neerstich toe,
En laet u door het quaet niet verblenden,
En wilt altijts toenemen int goe,
Ende u houden by Christus benden,
Oorlof hier mede wil ick 't enden,
Om u te senden is dit Liedt,
Willet van my int goede wenden,
Groet de bekende als ghy haer siet.
Door M. D. C. ☞ ☜ |
|