Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio E2v]
| |
nae de wijse: Al die in Syon zijt, &c.CHristus heeft ghesproken ient,
Soo in Mattheus staet geschreven,
Dat die vreesen,
Salich sullen zijn,
Die daer zijn beseven,
Geestelijck arm verheven,
Aldus seer fijn,
Met waren schijn,
Dat tot elck termijn,
Ghy alsoo oock meucht seer claer,
Voor die Heere der Heeren staen,
Om in vreucht te vermeeren gaen,
Dat wensch ick u eenpaer,
Al voor een nieuwe Jaer.
Noch sprack Christus daer by,
Salich zijn die draghen,
Rauwe ontbly,
Sulcken rouwe vry,
Als hem oock mach behaghen,
Wilt tot allen daghen,
Naer jaghen // ghy,
Sonder vilony,
Soo zijn herte sy,
En zijnen wille eerbaer,
Alle dese rauwe // goet,
Tot zijnen aenschouwe // soet,
Dat wensch ick u eenpaer,
Al voor een nieuwe Jaer.
Voorder sprack hy als ooc noot,
En heeft die salich ghepresen,
| |
[Folio E3r]
| |
Die sachtmoedich bloot,
Sijn alsoo hy ontsloot,
En sullen so wy lesen,
Besittende wesen,
Het aertrijck groot,
Sulck een herte mijnioot,
Der boosheyt ghedoot,
Al sonder eenich beswaer,
En dat alle benijden // vliet,
Tot allen tijden // siet,
Dat wensch ick u eenpaer,
Alle voor een nieuwe Jaer.
Noch heeft die Heere hoort dit aen
Die oock salich gheheeten,
Alle die saen,
Hongheren wilt dit verstaen,
En dorsten wilt dit weten,
Naer des gherechts secreten,
Want onbelaen,
Sullen sy sonder schaen,
Oock al ontfaen,
Versadinghe voorwaer,
Sulcke honger sonder vermyden // iet
Soo alle het belyden // hiet,
Dat wensch ick u eenpaer,
Al voor een nieuwe Jaer.
Noch heeft die Heere geseyt,
En haer salicheyt gaen verclaren,
Die barmherticheyt,
Sijn gebruyckende planteyt,
En sullen sonder beswaren,
Bermharticheyt vergaren,
| |
[Folio E3v]
| |
Deur sulcks verbeyt,
Van Gods Maeyesteyt,
Sonder afscheyt,
Sulck een hert deur ons middelaer
Sonder eenich verseren // quaet,
Soo de schrifteur algeren // gaet,
Dat wensch ick u eenpaer,
Al voor een nieuwe Jaer.
Noch heeft Christus seer snel,
Geheeten salich voordachtich,
Al die reyn wel,
Sijn van herten opstel,
Want sy sullen waerachtich,
Godt aenschauwen seer crachtich,
Vry van ghequel,
Van onreynicheyt fel,
Hoort mijn vermel,
Sulck een herte aldaer,
Tot zijnen Oordeele // voort
Tot uwen voordeele // hoort,
Dat wensch ick u eenpaer,
Al voor een nieuwe Jaer.
Noch heeft Christus verstaet,
Haer salicheyt gaen verconden,
Die delicaet,
Maecken der vreden graet,
Daer tot allen stonden,
Twist soude zijn bevonden,
Maecken dit vaet,
Der twist een aflaet,
Tot haerder baet,
Want sy sullen hier naer,
| |
[Folio E4r]
| |
Heeten Godts kinderen // dan,
Sulcx sonder daer te verminderen // van ,
Dat wensch ick u eenpaer,
Al voor een nieuwe Jaer.
Prince noch heeft die Heer playsant,
Haer salicheyt gaen verhalen,
Dien aen elcken cant,
Sijn vervolcht abondant,
Om des gerechticheyts taelen,
Want sy sullen voor quaelen,
Seer triumphant,
Het hemelsche lant,
Besitten vayliant,
Al met der heyligher schaer,
Dat u dit mach ghebeuren // mee,
Bevrijt al van der treuren // see,
Dat wensch ick u eenpaer,
Al voor een nieuwe Jaer.
Godt boven Const bemint.
☞ ☜ |
|