Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio C2r]
| |
op de wijse: Waeckt op, waeckt op sonder verbeyden.AEnhoort ghy s'Heeren generatij,
Ghy hebt Godts gracij, in s'Werelts pleyn,
En neemt doch niet te vele spacij,
Noch Conforcatij, maer hout u Reyn,
Van alle boose wercken,
Want Sathan met zijn Clercken,
Siet altijt waer in den Mensch is swaer,
Laet ons Godt vreesen int nieuwe Jaer.
Laet ons beter toesien expeerdich,
Dan die onweerdich, van Israel,
Die inde Woestyne waeren veerdich,
End' onvolherdich, des Heeren bevel,
Riepen om haer vleesch potten,
Abyron met zijn rotten,
Korach en Dathan versoncken swaer,
Laet ons Godt vreesen int nieuwe Jaer.
Den Heere en sal (vrienden ghepresen,
Geen aensiender wesen, seyt die schriftuer,
Dat moghen wy mercken mits desen,
Aen d'uytghelesen, van Israel puer,
Die't stelden op een loopen,
Van het crijsschen en roopen,
Dat sy van Abyron hoorden swaer,
Laet ons Godt vreesen int nieuwe Jaer.
| |
[Folio C2v]
| |
Noch leest men s'anderdaechs sonder falen,
Die Israliten murmereerden bloot
En gingen Moyses haer hooftman verhalen,
En seyden: Ghy hebt Godts Volck ghedoot,
Veerthien duyst, ses hondert menschen,
Verginghen deur haer wenschen,
Sy betrauden ooc op menschen wanckelbaer,
Laet ons Godt vreesen int nieuwe Jaer.
Dit quaem al deur datse murmereerden,
Ende temteerden den Heer excellent,
Hy riep haer, of sy wederkeerden.
Maer sy begeerden wellustich jent,
Den Heer was haer te mildich,
Sy waren alle wildich,
Dat was de oorsaeck van haer straffe swaer,
Laet ons Godt vreesen int nieuwe Jaer,
Maer laet ons den Heer ons droefheyt vertellen
Vry sonder quellen hem bidden om raet,
Hy sal ons wel op den rechten wech stellen,
Die naer schrifs vermellen ten leven ingaet,
Maer op hem moeten hopen,
Dach ende nacht aenroepen,
Ist alsoo niet soo vallen wy swaer,
Laet ons Godt vreesen int nieuwe Jaer.
Die dit Liedeken cleyne van weerde,
Dichte hy begeerde het rechte verstant,
Al van den Heere hooch als d'Expeerde,
Wy Asschen ende aerde gemaeckt vant lant,
Wat willen wy gaen beginnen,
Want Godt kent die Herten binnen,
Of het soecken is dan claer,
Laet ons Godt vreesen int nieuwe Jaer.
| |
[Folio C3r]
| |
O Princelicken Coninck vaillyandich,
Een mensch onverstandich, dicmael veel secht,
Maer als dien Dach sal comen brandich,
Heel onghehandich, den quaden knecht
Ick bidt u Heer ghepresen,
Wilt haer helpen mits desen,
Al die niet beters en weten zwaer,
Wilt haer gheleyden int nieuwe Jaer.
Salomon belydt // alle dinck heeft zijnen tijdt,
Weent metten weenenden en metten blyden weest verblijt.
☞ ☜ |
|