Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio A3r]
| |
ende gaet op de Wijse: Wel salich is hy, die Godt vreest.ANtwerpen schoon, eertijts vol Goets,
Tot den Hemel schier verheven:
Vol Weelden, Wijs, ende hoochmoets,
Gheheel wellustich int Leven,
In overvloet // van alle goet,
En schone costelicke waren,
Die ghy gheraept // hebt end gheschraept,
Och waer is dat alle vervaren.
Machtich van Schat, gheen uws ghelijck,
Boven alle Steden bevonden,
In Nering, ende Gewin seer rijck,
Door Waare aen u ghesonden,
Van elcken kant // seer abondant,
Besoch uyt alle Landen,
Met Silver en Gout // seer menichfout,
Och hoe ist in u ghemaeckt tot schanden.
Van waer comt u den groten noot,
Ende dat jammerlicke verderven?
Dat die Oude ende Jongers ghedoot,
Verrascht onversiens mosten sterven,
Van den Vyant // door Vier verbrant,
Het deerlick verdestrueren,
Vrouwen gheschent // t'waerste torment,
Is der jonghe Maechden violeren.
Als al u Goet, u was gherooft,
Most ghy u lijf noch ransoneren,
| |
[Folio A3v]
| |
Wie sou dat oyt hebben ghelooft,
Dat sy souden domineren,
In u eyghen huys met groot confuys,
Hoveerdich hooch verheven,
En u versmaet // met staudt ghelaet,
Doen dienen met vreesen en beven.
't Spaensche ghewelt, heeft u gheschent,
Veel Steden mostent oock besueren,
Groot Jammer, Druck ende Ellendt,
Mordadighe ongehoorde kueren,
Deur den Bloet-raet // seer wreet en quaet,
Heeft men horen clagen, suchten, karmen.
En veel gheween // by groot en cleen,
Tyranniseren sonder ontfermen.
Genadighe God, ons doch aenschaut,
En wilt t Volcxs lyden versoeten,
Geeft dat ons herte, op u betraut,
En voor u vallen te voeten,
Hebt doch ghedult // met onse schult,
Die groot is, dat moeten wy claghen,
Wy zijn in noot // door Sonden groot,
Daer deur commen ons dese plaghen.
Wy, ende oock onse Overheyt,
Hebben Heer voor u quaet ghedaen,
Leefden in onghehoorsaemheyt,
Ws Woorts leeringhe niet ontfaen,
Vervreempt van God // ende zijn ghebot,
Verblent in onser herten,
Den Vroomen verjaecht // ende gheplaecht,
Daerom zijn wy oock nu in smerten,
Om ws naems wil: O Heer goet,
Wilt onser doch ghenadich zijn,
Gheeft ons berau, al met oetmoet,
| |
[Folio A4r]
| |
Naer u straffe bringt ons uyt gepijn,
Van ons misdaet // Veel ende quaet,
Verlost ons Heere almachtich.
Die arm gemeen // brengt uyt t'gheween,
Die seer verdruckt u vallen clachtich.
|
|