Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe den cattoen oft boom wolle wast ende den Brasiliaensenpeper, ende ooc sommige ander wortelen meer die welcke die wilden planten om teten.
Dat xxxviij Capittel.

DEn Cattoen oft boomwolle wast op boomkens ontrent eenen vadem hooghe, heeft veel scueten oft tacken, als sy bloyen soo crijgen sy veel knoppen, als die ryp worden soo gaense open ende die wol staet also inden knoppen om ronde kerenkens die sijn swert dwelck dat saet is daermense af plant ofte sayet ende die tacken sijn heel vol vanden knoppen.

Den peper van dien lande is tweederley faetsoen, den enen is geheel den anderen root, maer wast op een maniere, als si groen is so is si als haechbesien, die opte doornen wassen, het is een cleyn boomken ontrent een half vadem hooch, ende heeft cleyne bladerkens hangt vol van den peper, is scherp inden mont plucken hem af als hy getijdich is, droogende inde sonne, ende daer is noch een ander fatsoen cleynen peper, den voorgenoemden niet seer ongelijck, welcken sy oock also als den

[fol. L3r]

anderen drogen. Daer sijn oock wortelen die Iettiki heeten, die syn van goeden smaec, als sy die planten, snijden sy die in cleynen stucken, steecken die stucken in deerde, dat ontfangt hem, ende bereydet hem ouer die eerde ghelijck hopsmeten, ende wort vol van dien wortelen.