Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe sy haer aenslagen maken als sy willen in haren vianden lant ten crijch trecken.
Dat .XXVII. Capittel.

ALs sy willen in haren vianden landt ter oorloghen trecken, sy vergaren hen haer ouersten, houden raet hoe sijt maken willen dat ontbieden sy dan in alle hutten door en weer dat si haer op rusten, ende si noemen eenderhande fruyt der boomen als die rip worden, so willen si wt trecken want sy hebben gheen onderscheydt der iaren ende daghen oock bestellen sy eenen tijt wt te trecken alser een gheslacht visschen wter zee inden riuiere loopen die welcke sy Pratti heeten op haer spraeck ende den ligghenden tijt alsmen die visschen siet noemen si Pirakaen, op sulcken tijt rusten si haer met naeckers ende pijlen, ende hertwortel meel dwelck si heeten Vythan tot victalie daer na beraden sy haer metten waerseggers Pogy oft si victorie sullen hebben die seggen dan wel ia doch toch beuelen sy haer dat sy achtinghe op die droomen hebben souden die haer vanden vianden droomden, als den meesten deel droomt datse sien haerder vianden vleesch braden, dat bediet victorie, maer als si sien haer eygen vleesch braden dat en bediet niedt goedts, soo dat sy dan thuys blijuen, als haer dye droomen nv wel behaechden, soo rusten sy haer op, maken in alle hutte ghroote vrolijckheyt met droncken drincken, en dansen metten afgoden Tammaraka een yeghelijck bidt den sijnen, dat hy hem help eenen

[fol. K5r]

vyant vanghen, daer nae varen sy henen als sy dan vast by haerder vyanden lant comen so beuelen haer ouersten den nacht te voren als sy des anderen daechs haerder vyanden lantschap willen aen vallen, dat si die droomen onthouden souden die welcke hier die nacht droompt, Ick was eenen toch nae haer, als wy nv vast by haerder vianden lant waren des auonts te voren, soo haer meyninghe was den anderen nacht haerder vianden lant aen te vallen, ghinck die ouerste door den legher henen, seyde haer dien nacht droomen wel behielden die haer dien nacht droomen souden, gheboot voert dat die ionghe ghesellen als den dach op brack wildt schieten souden ende visschen te vanghen, dat ghebuerde also die ouerste liet gereet maken, daer nae ontboot hy die ander ouersten die quamen voor sijne hutten, sitten haer alle opter eerden in eenen ronden cirkel, liet haer teeten gheuen, als sy gheeten hadden vertelden sy droomen, soo veel als haer wel behaechden, daer na dansten sy met haren Tammaraka van vruechden, haerder vyanden hutten besaghen sy inder nacht vallen aen, meer inden mergen stont als den dach op ghaet, als sy eenen vanghen dye seer ghewont is, dien dooden si terstont ende vueren dat vleesch ghebraden mede thuys, maer dye noch ghesont sijn vueren sy al leuendich mede thuys, daer nae in haren hutten dooden sijse Sy vallen aen met eenen grooten gheschrey treden stijf opter aerden, blasen in basuynen van langhe couworden ghemaect, sy hebben alle ghader snoeren om haer lijf ghebonden om die vyanden daer mede te binden schilderen ende vermalen haer met rooden vederen op dat sy voor die ander bekent

[fol. K5v]

souden wesen schieten seer oock gheringhe vierighe pijlen op haerder vyanden hutten, om die daer mede aen te steken, ende als de eerder een gewont wort, hebben si haer eyghen cruyden daer sy haer mede heelen.