Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Waer aen dat sy gheloouen
Dat xxiii .Capittel.

SY gheloouen aen een dinck dat wast als een ronde couworde, ende is soo groot als eenen pot van eenen pot nats, het is binnen hol, steken een cleyn stocxken daer door, snijden een gaetken daer in ghelijck eenen mont, ende doen cleyn steenkens daer in dattet ratelt ratelen daer mede als sy singhen ende dansen ende heetent Tammaraka, ende is gheformeert oft ghemaeckt ghelijck hier na volcht.

[fol. K2v]

Die selue hebben dat mansvolck elck een eyghen sy syn nv sommige onder haer die sy noemen Paygi, die worden onder haer geacht gelijckmen hier die waerseggers acht die selue trecken des iaers eens door dat landt, in alle hutten ende gheuen te verstaen hoe dat eenen gheest by haer is geweest, die welcke verre van daer wt vreemde landen comen was, hadde haer die macht gegeuen dat alle die ratelen Tammaraka die welcke wouden, souden spreken ende macht crighen daer sy om baden soude haer geworden ende gegeuen wesen, ende so gebueren. Een yegelijck wil dan dat in syne ratelen die gewelt connen maken eenen groten feeste met drincken, singen, ende waerseggen, houden veel seltzame ceremonien, daer bestellen die waerseggers een dach inden hutten, die welcke sy ledich maken, daer en moeten gheen wijfs noch kinderen in blijuen, dan ghebieden die waersegghers dat een yeghelijck sijn Tammaraka root ververwe met pluymen ende daer in come, so wil hi haer die gewelt ouer leuere dat sy spreken sullen. Daer nae comen si inder hutten soo setten sy haer bouen aen die waersegghers, ende hebben haren Tammaraka by haer inder eerden steken die andere de huere oock een yeghelijck gheeft den waersegghers giften oft gheschenck die welcke sijn slitspijlen vederen, vinghen die sy aen die ooren hanghen op dat een yeghelijcken sijne Tammaraka niet vergeten en worde, als si dan alle by malcanderen sijn soo neempt hy dan yeghelijcx Tammaraka sonderlijcken, ende beroeckse met cruyt, twelcke sy Bittin noemen daer na neempt hy die ratel vast voor den mont ende ratel mede, seyt totten ratel. Are Koca, nv spreect ende laet v hooren sydy daer in-

[fol. K3r]

ne dan spreect hy met cleynder stemme ende rasch een woort datment niet wel mercken en can oft die ratel doet oft dat hit doet, ende dat ander volc meynt dat die ratel doet maer dye waerseggher doet hy met allen ratelen die eenen nae den anderen een Ieghelijck meynt dan dat sijn ratel ghroote macht by haer heeft, dan ghebieden hen die waersegghers dat si ten crijch trecken vyanden vangen want die gheesten die inden Tammaraka sijn hebben lust slauen vleesch te eten, nae die raet trecken si naden crijch, wanneer nu die waerseggher paygi wt allen ratelen goden gemaeckt heeft soo neemt dan een yeghelijck syn ratel wederom nae hem, ende heetse lieue soon, maeckt hem een eyghen hutken, daert in staet, sedt hem eten voort, begheert van hem alle wat hem van noode is, ghelijck als wy den warachtighen god doen, die hemel ende eerde geschapen heeft bidden, dat syn nv haer goden. Metten warachtighen God die hemel ende eerde geschapen heeft, en hebben sy geen becommeringe houden voor een out heercomen dat hemel ende eerde gheweest sin en weten sus niet sonderlic van den beghin der werelt, dan sy segghen, daer eens groot water gheweest dat heeft alle haer voorvaders versopen, ende sommighe sijn in eenen naecker daer wt comen, sommige op hooghe boomen het welc ick achte, het moet die Deluuie geweest sijn als ick nv die eerste reyse, onder haer quam, ende sy my daer af seyden meynde ic het was een duyuels voor spel want sy seyden my dicwils hoe dat die dinghers spreken, als ic nv inden hutten quam daer die waerseggers in waren die welcke die dinghers souden sprekende maken, moesten sy haer alle neer setten, maar als ic dat bedroch sac

[fol. K3v]

ghinck ic terhutten wt ende dacht hoe arme verblinden volck is dat.