Will Wintjens (1940)
De sjäör
En nog, ederskier es iech euver de Pieterstraot loup en delangs kom, daon iech esof iech 't neet zeen. Esof 't mien eige hoes is en iech m'ch geneer veur de buurt. Lès waor mie sjoenzuster oet Den Haag op bezeuk. Iech höb 'ne ganse tournee gemaak via Taofelstraot en de Klein Lurestraot um veural néét delangs te hove koume.
Iers meinde iech tot ze nog bezeg waore en iech dach nog, dat doort ziech wel ein. Meh opins waore de stellages eweg, geine wèrkmins mie te zien en wat bleef waor die sjäör! Iech zègk nog tege mevrouw Pasmans, 't zal neet woer zien. Zoe sjoen gebouw. Höbbe ze daoveur noe zoelang mote graove en daan zoeget. En iech waor neet d'n einegste, want de ganse Molenhof heet sjan devaan gesproke.
En iech höb ze wel langs zien koume, die vaan 't stadhoes, dus iech drachteraon. En dao stoonte ze allemaol veur die sjäör en dao waor zoe'nen Hollender bij en dee had 't hoegste woord. En mer mèt die erm aon 't zwejje en aon 't wieze en de res loerde nao die sjäör esof 't de Lourdesgrot waor. Dus iech zègk tege dat keureg vruiwke oet dee kaffee daotegeneuver: ‘Wat vint geer dao noe vaan?’ Want iech weet tot in dee kaffee väöl interlectuele koume. ‘Nou,’ zeet ze, ‘m'ne maan is binne de kortste kiere vief kilo devaan aofgevalle. En noe neet dat bij häöm neet get draof kós, meh 't is dudelek, iech bin dus neet de einegste die ziech dreuver opvrit.’
En 't sjoenste is, noe höb iech gehuurd tot die sjäör dao is umtot dao vreuger de stadsmoer leep. Jeh meh, noe vraog iech diech. 't Is al erg genóg tot dao nog altied ganse stökke vaan stoon. Iech mein, dao langs 't Laank Gresje zouwe ze toch prachtege flats deneer kinne zètte. En trouwens, es ze euveral e stök oet 'ne moer ginge houwe boe vreuger get gestande heet, daan woort 't hei in Mestreech toch eine bouwval.’
't Moot mer 'ns gezag zien: tot zoe'n gemeinte ziech door d'n ein of aandere kunstemeker vaan dao bove zoe'n tuut wuif in häör voes liet duie! Iech bedoel, es iech doed bin, hakke ze toch ouch gei stök oet de Molenhof um aon te geve tot iech achter die sjäör altied nao boete zaot te loere.
Auteursrechtelijk beschermd
