They Bovens (1925-1993)
Lès in de Mestreechter taol
't Zal e jaor of ach, nege geleie zien, tot iech op 'nen aovend Professor Tiddens, in deen tied Rector Magnificus vaan de keersveerse Rieksuniversiteit Limburg, in ein vaan de Mestreechse etablisseminte tegekaom. 't Waors nao aofloup vaan 'n Dies-viering vaan de N.U.L., de Narren-Universiteit Limburg. Veer kaome zoe te spreke euver 't Mestreechs. Mèt 'ne gekke slaag zag iech tege häöm tot iech 'm wel ins Mestreechs zouw liere. Iech had dao niks koeds mèt gemeind en dao zouw ouch niks gebäörd zien, es Professor Tiddens eine vaan hei zouw zien gewees. Mestreechtenere numme ziech oonderein jummers zoe dèks zoonder wijer verpliechtinge get veur. Meh, wie gezag, de perfesser waor neet vaan hei en daomèt naom heer dinger serieus, boevaan eine vaan us, laot miech zègke, dèks nog gei bezej had. Umtot iech in deen tied nog in de Groete Staat woende, kaom iech de perfesser dèks tege, want ouch lui, die neet vaan hei zien, mote welins nao de stad um kemissies te doen.
Ummertouw es iech häöm tegekaom, vroog heer miech: ‘En wanneer beginnen de lessen?’ In 't begin wis iech nog 'ns gaar neet boe heer 't euver had, meh nao 'n tiedsje góng miech e leech op en rappeleerde iech miech wat iech 'm aon 't bufèt versproke had.
Noe is 't zoe tot eine vaan us vaan keendsaof 't es 'n erfzun heet mètgekrege, tot heer zwoer oonder d'n indrök raak es lui, die neet vaan hei zien, 'm get vraoge.
In 'n vraog ligk bij die lui al min of mie 'n opdrach beslote. Dat höbbe ze sjijns weer es erfzun vaan keendsaof mètgekrege. Zelfs bij erfzun geit 't neet altied ierlek touw en zien die vaan hei mie es ins 't minderbedeild keend gewees. Um kort te goon, Professor Tiddens bezokde miech zoe dèks mèt die versproke lèsse tot iech um vaan 't gelazer aof te zien, bij m'n eige dach: ‘En boeveur ouch eigelek neet?’
Noe waor iech in deen tied nog in 't bestuur vaan de Volksuniversiteit. Zoe kós iech dat instituut insjakele um 'ne cursus in de Mestreechter Taol te annoncere. En jewel, dao kaome hiel get aonmeldinge binne, allein gein vaan de perfesser. Mèt ziene veuroetzeende blik wis heer sjijns toen al, tot heer Mestreech op korten tied zouw verlaote, get wat ouch gebäörde.
Auteursrechtelijk beschermd