Tum Pieters (1921-1998)
't Gaaslampeleech
Zoe rösteg, gelege tösse de brögke,
Blinke de tores vaan mie Mestreech,
Doen miech weer dinke, boe zien die jaore,
Iech zaot op 't stupke, in 't gaaslampeleech.
't Greunechteg leechske verleechde mie sträötsje,
Bloonk in de roete vaan 't hoes op 't heukske,
Iech zaot op 't stupke, tèlde mien huive,
'n Sjäör in mien humme, voel waos mie breukske.
'ne Moneka späölde, broelof hei neve,
Viva gezoondheid, ze aote hun vlaoj,
Dansde de polka, struide confetti,
Ete en drinke deit noets niemes sjaoj.
Gónge veer zwumme, abele toeke,
'n Smik en e tuiwke, drej kókkerelke,
Jojo dee drejde, gónge veer reipe,
Euver 't Gresje, daan langs 't Welke.
Leedsjes gezoonge, bökske gesproonge,
Hinke en springe, wat e plezeer,
Speulende kinder wee zuut 't neet gere?
Klepper de kleppers, ein, twie, drei, veer.
‘Tremke vaan Smeermaos flötde zie deunsje,
Iech drökde mie neuske tege de roete,
Bromele plökke, molbere* zeuke,
D'n tied vaan vekantie veer trokke nao boete.
Gaaslampeleech, gaaslampeleech,
Liet miech mèt heimwee veur mie Mestreech,
Gaaslampeleech, gaaslampeleech,
Liet miech mèt heimwee veur mie Mestreech.
| |
Auteursrechtelijk beschermd