Anoniem
Sermoen
God bewaor uch es gaer gei Mastreechs en kónt*, zoe zag mien auw moor. Die ein zaak neet alle daog en doen*, die meine: zij hajje* alle de sjoenheid van 't Mastreechs al weg, as ze de Mastreechsen Diksenarium* ins ingezeen hèbbe. Mer* wat zien ze d'r neve! Weite ze ouch, dat de sjoenheid van ein spraok 't nötste* dingk van de werreld is; ein dingk zoe nöt dat me ete, drinke, jao alles daoveur zou laote stoon? En huurt me ouch ei paar mooswiever zich de woerheid zègke, en dat dan de manslui tösse kómme, wat is dat neet ei plèzeer as me huurt wie hun dej babbej* geit; en daobij de sjoenste wäörd van de werreld, par exempel: doe sjwerenootse* lómpen hónd, doe horekind, doe sjinmaer*, doe loeszak, doe raekel, doe canaille, doe hore-jaeger etc. etc. Ich kón* uch zègke: wie ich* 't d'n ierste kier van-me-laeve gehuurd hèb, ich stónt as hej ich in de brook gesjete. Ich dach: wie is 't meugelek dat 'n vrouw, dej van janhagel aofkump en dej bij 't rapalje groet gebrach is, zoe'n sjoen dinger* kan zègke. 't Rolde oet häör moul wie 'n lei van 't pannedaak, zoedat ich 't nog neet in mien huid* kón kriege, woe zij 't vandan hole.
Wat ein sjoenheid, wat ein levegheid stik neet in de wäörd. Wat dunk uch noe, gaer zeet toch Mastreechtenaers, wat bleef uch? Gaer staot te kieke wie Piet Snot. Hèb gaer noe de moul vol tan? Dat geluif* ich.
Zègk mich ins: wat-v'r spraok zaet sjoender de kleine vinger met ein woord ‘kink’, as 't Mastreechs zeet? Kan me waol get sjoender dinke of zègke, as op zich good Mastreechs: ‘Ich slabrik op 't ies en veel op mien vot.’ Wie gek, wie gek zeet gaer d'rum neet, dat gaer eur bèste jaore laot veurbijgoon zónder uch op 't Mastreechs te lègke en de levegheid daovan te liere. Mer ich weit woe 't vandan kump: wieväöl van uch zien 'r, dej zoe ein platte vot hèbbe, dat ze kónne einen haven daag d'rop zitte blieve veur 't Mastreechs te studere of in de sjriefbeuk van d'auw lui op te zeuke, en te zien* of ze neet hei en dao ei wäördsje vónte* dat nog neet in de Mastreechsen Diksenarium en steit, en zien metein ins wat baeter gezag is: ‘ich sjievel op mien vot’ of ‘ich rol op mien vot’. Zij loupe in de plaots nao de koffiehoezer en nao de herberge woe ze eine kale Fraansman vinde dae ze kónne naoape, en dat is hun groetste plèzeer. (...)
Auteursrechtelijk beschermd