Nieuwe gheestelijcke refereynen ende liedekens

Een ander Bruyloft-Refereyn met presentatie van eenen gheestelijcken Mey, op een geestelijcke Professie.

BRuyt Christi, en suster, tot uwer eeren,
En om te vermeeren// v feeste present,
Oock om het geselschap wat goets te leeren,
Heb ick my gaen keeren// tot den boomgaert ient
Van uwen Bruydegom Christus excellent,
In v herte geprent, hy staet in saisoen,
Want t'swinters en t'somers is hy even groen,
Daer wilde ick gaen doen// naer der minnaers raet,
Die hen lievekens nv den Mey dragen coen:
Gheluck sy v, Bruyt, in desen nievven staet.

Desen boomgaert der heyliger Schriftueren,

Die altijt sal dueren// treed ick in te hant:
Schoone boomen van verscheyder natueren,
Ter goeder uren// vond' ick daer in plaisant,
Al vanden oppersten Hovenier gheplant,
Tot ons onderstant// en geestelijck proffijt,
Daer vond' ick den boom des levens breed en wijt,
Den boom der wetenheijt// van goet ende quaet,
Daer Adam van proefden door des duyvels nijt:
Gheluck sy v, Bruyt, in uvven nievven staet.

Inden Wijngaert die Noe heeft ghevonden,

In corter stonden// creech ick mijn behagen,
Op den Vijg-boom sadt Zacheus ghebonden,
Met vele sonden// Moysen hoord' ick vragen:

[p. 10]

 

Wat dat bediedden die brandende hagen?

 

Ick sach oock dragen// Palmen en Olijven

 

Ter eeren Christi/ om feest te bedrijven.

 

Ander boomen zijnder van verscheyden saet,

 

Diemen in desen boomgaert siet beclijven:

 

Gheluck zy v, Bruyt, in desen nievven staet.

 

Ick siender oock eenen Ieneverboom staen,

 

Die staet my wel aen// om v, Bruyt, te planten:

 

Op dat ghy hier onder mocht rusten gaen

 

Met Helias voortaen// een van s'Heeren gesanten:

 

Hy vondt hem seer beswaert van alle canten,

 

Hy begonst te twanten// maer in corter tijt

 

By desen boom rustende. wordt hy verblijt,

 

En versterckt met iolijt// om tot zijnder baet

 

Te reysen totten berch Godts gebenedijt:

 

Gheluck zy v, Bruyt, in desen nievven staet.

 

Desen Ieneverboom die schijnt te zijn

 

Een bedietsel fijn// van het Cruys gepresen:

 

Daer ane den Bruydegom starff// en als Medicijn

 

Van des vyants venijn// ons heeft genesen:

 

Ten derden dage vander doot verresen.

 

Crachten vuytgelesen// hebben die vruchten

 

Tegen vele sieckten, ten zijn geen cluchten,

 

Hoesten en kuchten// quetsuren desperaet,

 

Geswillen, quade magen, wilt nyet duchten:

 

Gheluck zy v, Bruyt, in desen nievven staet.

 

Alle die naerder zielen zijn sieck oft gewondt,

 

Die worden gesont// doer Christus Cruys machtich:

 

Der sonden venijn kant veriagen terstondt,

 

Dwelck den helschen hondt// doer zijn listen prachtich

 

Inde zielen stort: het verwermt oock crachtich

 

Ons herten stantachtich// om nyet te flouwen,

 

En inde liefde Godts nyet te vercouwen:

 

Het doet oock verdouwen// als die sneeu vergaet,

 

Geswillen van droefheyt die t'hert benouwen:

 

Gheluck zy v, Bruyt. in desen nievven staet.

Bruyt, Suster, desen Mey-boom houdt in weerden,

[p. 11]

 

En wilt hem aenveerden// int herte ioyeus

 

Wilt hem toch planten, nyet inder eerden,

 

Gheen wapenen noch sweerden// soo victorieus

 

Als desen boom is teghen den helschen keus,

 

Ghy sult couragieus// door het cruys winnen

 

Allen opval van buyten en van binnen,

 

Met soete sinnen// leert hier oock metter daet

 

Vwen Bruygom vuter herten beminnen:

 

Op dat v salich zy desen nievven staet.