Nieuwe gheestelijcke refereynen ende liedekens

Een gheestelijck Liedeken, dienende opt voergaende Refereyn inde persoon vande Bruyt,

Op de wijse: Den lustelijcken Mey.

MEt desen soeten Mey den twintischsten dach
Moet ick my gaen bereyden,
Dat ick den hoochsten Bruydegom dan trouwen mach
Om van hem niet te scheyden:
Hy heeft my met eewege liefde bemindt,
Daerom heeft hy op my wel verdient,
Dat ick hem met liefden reyne
Schincken sal mijn hert alleyne.

Mijn redelijcke ziele doen zy niet en was

Heeft hy soo schoon geschapen,
Als zy door de sonde nv verlaren was,
Heeft hyse comen rapen:
Drijendertich iaren heeft hyse gesocht,
Met zijnen rooden bloede gecocht,
Door zijn doot creech ick dat leven:
Lof sy hem toegeschreven.

Hoe dickwils in sonden swaer en menigerhandt,

Soude ick hebben geresen,
Had' hy dat niet beledt door d'onderstandt,
Dat hy my heeft bewesen:
Naerden lichaem heeft hy my bewaert
Van veel dangiers, en my vergaert
Als een hinne vergaert haer iongen:

[p. 12]

 

Dus sy hem loff gesonghen.

 

Ter wijlen ick de werelt valsch lang heb ghedient,

 

Van hem was ick gheweken:

 

Ick was seer verre verdoolt, en oock verblint.

 

Door swerels boose treken,

 

Hy heeft my langh tot beternis verwacht,

 

Om my te trecken vuyter sonden macht,

 

Van zijn lancmoedicheden:

 

Louet hem tot allen steden:

 

Van te voren scheen my de werelt soo schoon,

 

En loech my vrindelijck aene:

 

Tot dat ick naerderhandt haeren quaden loon

 

Heb comen te verslaene,

 

Ick sach dat zijer soo vele bedrooch,

 

Sy beloofden te geven daer sy aen looch,

 

Ick dacht tot mijnder baeten,

 

De werelt wil ick laeten.

 

Allen haer wellust en cort plaisier,

 

Wil ick nv gaen versaecken,

 

Inden schoonen boomgaert mijns Bruygoms fier,

 

Sal my voortaen vermaecken:

 

Daer in staet eenen Ieneverboom plaisant,

 

T'cruys opden berch van Calvarien gheplant:

 

Door wyens vrucht ghepresen,

 

Is mijn ziel heel ghenesen.

 

Prince met Helias hier moe en mat,

 

Wil ick nv blijven rusten,

 

Den minnelijcken troost die ick hier vat,

 

Die mach mijn ziel ghelusten:

 

Hier wordt zijn swaerheyt ghecourageert,

 

Inden wech der deuchden gheconforteert,

 

Om daer boven te gheraken,

 

En d'eeuwige vreucht te smaken. AMEN.