|
| |
| |
| |
Bruyloft-Refereyn, Op de cleedinge van een gheestelijck dochter.
IN allen v wercken, o Godt almachtich,
Moet ghy aendachtich// van ons zijn gepresen
Soo de schriftuere ons ghetuycht warachtich,
V wercken crachtich// daer worden ghelesen.
Inden raet der goeden loef v by desen
(Spreeckt Dauid den Propheet) metter herten soet,
V wercken te volprijsen en can niet wesen.
Lof sy v, Heere, van alles dat ghy doet.
Onder allen, o Heer, naer mijn cleyn verstand
Prijsen wy v want// ghy t'volck vuytvercoren
Van Israel deede gaen wt Egipten lant
Met crachtighe hant// soo ghy hadt gesworen.
Sy zijn ghepasseert (tis wonder om horen)
Al door de roode zee met drooghen voet
Als Moyses de wateren dede schoren.
Lof sy v, Heere, van alles dat ghy doet.
Herdt en versteent Pharao deede vergaren
Al zijn boose scharen, om met quaet opset
V volck te vervolghen met groot vervaren,
En sonder sparen// weer te brenghen int net.
Maer, Heer, v cracht heeft dat haestelijck belet,
Sy zijn al verslonden, snel en onbehoet
Ghelijck loot en steen daer inden gront gheset.
Lof sy v, Heer van alles dat ghy doet.
Alsoo doet ghy dagellijcx, Heer der Heeren,
Veel menschen passeren// wt Egipten, quaet,
Die ghy leert de weerelt abandonneren
En hen bekeeren, tot gheestlijcken staet.
Daer den helschen Pharao Sathan vol haet
Met zijn macht wort versmoort inden helsche gloet,
Sy werden versterckt en volghen uwen raet.
Lof sy v, Heere, van alles vvat ghy doet.
Noch weerelt, noch vleesch en mogen hen schaden
Als sy wel beraden// op v/ Heer, bouwen:
Al zijn sy oock swaer met sonden beladen
| |
| |
Wt alle quaden// die hen hert benouwen
Sult ghyse dan helpen, wt Sathans clouwen
Trecken, en bevryen, voor s'duevels ghevroet
En als v bruyt inder eeuwicheyt trouwen.
Lof sy v, Heere, van alles dat ghy doet.
Niemant en soude met tonghen verhaelen
Die soete straelen// die hen daer verthoonen,
Welck sy genieten, dickmael sonder falen
In Sions salen// die lieffelijck woonen,
Daer ghyse spijst Heer, om haer te verschoonen
Met dat Hemels manna, t'is van smake goet,
Die volherdich strijdt begeert ghy te croonen.
Lof sy v, Heere, van alles dat ghy doet.
Al sien sy oprijsen een sware tempeest,
In dees foreest// sy en derven niet treuren:
Siet den onderstandt vanden Heylighen Gheest,
Met vrolijcke feest// sal hen haest ghebeuren,
Wie hen vyanden sal helpen verscheuren,
En brengen in het landt dat van honich bloet
Daer hen geen tranen en sullen beseuren.
Lof sy v, Heere, van alles dat ghy doet.
Eerweerdighe Bruyt inden Heere bemindt,
Dit toch wel versint// alle v leven lanck,
Op dat ghy desen staet wel loflijck bedient
Die ghy nv begint// vry en sonder bedwanck,
Dancket Godt den Heere met vrolijck gesanck
Van wien v comen is dit groot voorspoet
Seght altijdt O Heere, ick wetet v danck.
Lof sy v, Heere, van alles dat ghy doet.
Peyst sonder vergeten hoe menich dangier
Dat ghy nv schier// in alles zijt ontloopen,
Want soo wie hier dient, t'sy knecht oft camenier
Dese werelt fier// (ick moet v ontknoopen)
Zy vallen in sonden met groote hoopen,
Ghelijck rancken drooch vanden wijnstock ghesnoet
In het eeuwich vier// moeten zijt becoopen:
Lof sy v, Heere, van alles dat ghy doet.
O lacen wacharmen hoe qualijck bedacht
| |
| |
Is alsulcken iacht// die de werelt nv eert,
Dat sy soo neerstich loopen met alder macht
Totten eeuwighen nacht// in boosheyt vermeert,
Hadden sy haer in tijdts tot Christum ghekeert
Met groot berou der sonden bitter als soet,
T'waer hen al vergheven, soo schriftuere leert.
Lof sy v, Heere, van alles dat ghy doet.
Een mensche gheschapen naer Godts figure
Heeft hier dach noch ure// oft sekeren tijt,
Hy moet hem bereyden al valt dat suere,
Tot Godts oordeel stuere// oock met alder vlijt,
Als den rechter ghebiedt, daer is gheen respijt
Waeromme hy altijt bereedt wesen moet,
Op dat hy dan mach segghen tot s'duyvels spijt.
Lof sy v, Heere, van alles dat ghy doet.
Loon naer alle zijn wercken alhier ghedaen,
Sal hy hier naer des heylichs Gheest goet vermaen
Ghesocht altijt voort te gaen// van deucht in deught,
En Godts Heylighen (dit wel bevroet)
Sal hy in glorie dan werden verheucht,
Lof sy v, Heere, van alles dat ghy doet.
Benaut ende beschaemt oock zeer verslaghen
Door d'aenstaende plaghen// sal hy dan suchten,
Heeft hy ghenomen stout sonder naer vraghen
Hier zijn behaghen// in swerels ghenuchten,
Van d'aenschijn Godts sal hy dan moeten vluchten
En vallen inden clau des vyants verwoet,
Want dit zijn alleen der sonden vruchten,
Lof sy v, Heere, van alles dat ghy doet.
Vol van alle gheclach// vol bitterheden
Wilt hier op, Suster, altijt nemen ghesach,
Denckt sonder verdrach// op de eeuwicheden
Daer bouen in glorij, in pijn beneden:
Het sal v verwecken tot salighe boet
Te dienen den Heere met al v leden,
| |
| |
Lof sy v, Heere, van alles dat ghy doet.
Ruymen de werelt met haer pomperijen,
Sal tot gheenen tijen// v duncken te swaer,
Maer om te ontvlieden het eeuwich lijen
Sult ghy met verblijen// noch wt liefden claer
Geern penitency doen stil en openbaer,
Al soudet v hier costen oock vleesch en bloet,
Segt nu adieu mijn vriendekens allegaer.
Lof sy v, Heere, van alles dat ghy doet.
Christus den Bruydegom naer zijn sententie,
Sal v penitencie// vergelden al,
In s'vaders presentie// wt d'jammer dal,
Daer sullen v d'Engelen in groot ghetal
Willecom heeten met lieffelijcker groet,
Lovende den Heere van v goet gheval,
Lof sy v, Heere, van alles dat ghy doet.
Prince.
Hier mede wil ick sluyten myn Refereyn,
Eest van consten cleyn// t'wert nochtans ghedreven
V, Suster, ter eeren door der liefden treyn,
Op dat ghy hier reyn// altijt so mocht leven
Vwen naem int boeck des Heeren geschreven,
Mach eeuwelijck blijven, zijt toch wijs en vroet,
Danckbarich van herten seght daer beneven:
Lof sy v, Heere, van alles dat ghy doet.
|
|
Auteursrechtvrij