Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Hoe die coninc van Vrancrijc verloes eenen strijt iegen den coninc van Ynglant, en̄ van .III. goeden poenten. C. XIV.

 
DOen ic dit boer hadde bracht
1135
Tote hier / metter Gods cracht /
 
Ghelijc dat ghi nu moghet horen /
 
Quam mi een mare te voren
 
Die te horne es jammerlike /
 
Dat Philips / coninc in Vrancrike /
1140
Soude hebben ghestreden
 
Met groter moghentheden
 
Ieghen den Edewaerde van Inghelant.
 
Doen so dachtic al te hant
 
Dat dese wrake / doen ict hoerde /
1145
Wel tote desen boeke behoerde;
 
Want sint dat die van Rome /
 
Alsic merke en̄ gome /
 
Ieghen die Affrike streden
 
(Des es vele meer tijts leden
1150
Dan .M. jaer) / so en ghevel
 
So groet manslacht / wet wel /
 
En̄ daer so vele heren groet
 
Opten velde om bleven doet
 
Onder coninghe en̄ hertoghen /
1155
Graven en̄ bisscopen vermoghen /
 
Baenroetsen en̄ ridderen mede /
 
En̄ knapen / die daer ter stede
 
In Philips side bleven doe
 
Tote .XL.m. toe /
1160
Daer Edewaert met ghewelt
 
Op dien tijt behielt dat velt;
 
Daer hadde hi cume nochtan
 
Enen jeghen .v. manne.
 
Dit ghesciede / gheloves mi /
1165
Niet verre van Annous in Brij1.
 
Lieve kindre / nu wilt merken /
 
Hoe God / Onse Here / can werken /
 
En̄ hoe van allen dinghen
 
Sijn vonnesse can toe bringhen /
1170
Hoe dat comt van over dmere
 
Een coninc met enen cleynen here
 
In die crone van Vrancrike /
 
Dat die macht es van Kerstenrike /
 
En̄ wint hem af borghe en̄ lant /
1175
En̄ street met hem metter hant /
 
En̄ wint hem af dat velt /
 
Alsic u vore hebbe ghetelt.
 
Ay / ghi princen van ertrike /
 
Alse ghi sit hoeghelike
1180
In uwen stoele met groter welde /
 
Als riddre of knape voer u helde
 
Nighen en̄ sijn onderdaen /
 
En̄ alle tuwen dienste staen /
 
So en verheft u min no mere /
1185
Maer peynst dan dat een here
 
Boven u es / die u mach
 
U leven nemen op enen dach /
 
En̄ ghedenct oec met herten sijn /
 
Dat die liede u niet en sijn /
1190
Maer Gods liede Ons Heren /
 
Die Hem daer toe woude keren /
 
Dat Hi om haer salicheyt groet
 
Mensche wort en̄ starf de doet.
 
Castijt u / heren / castijt
1195
Bi andren heren / het es tijt /
 
Eer God / Onse Here / met allen
 
Laet sine wrake op u vallen.
 
Want als ghijt minst moedt / so mach
 
Op u comen die sware slach /
1200
Ia / onversien ende onverhoedt /
 
Als ghijt alderminst moedt /
 
Also ghi daghelijx moghet sien
 
Aen andren heren ghescien
 
Al omtrent u / hier en̄ daer /
1205
Met jammerliken slaghen zwaer.
 
Die selve God dien sloech
 
Mach u slaen / eest sijn ghevoech.
 
Het es gheseghet te menegher tijt:
 
Die hem bi enen anderen castijt /
1210
Wert ghecastijt sachte.
 
Elc hem hier jeghen wachte.
 
Drie poente sijn / alsicse sach /
 
Daer met dat elc mensche mach
 
Behouden die gheminthede
1215
Sijns Sceppers en̄ der menschen mede /
 
Die harde licht te doen sijn /
 
Also icse las int Latijn.
 
Dierste es inden beghinne
 
Dat hi die Heylighe Kerke minne /
1220
En̄ hare recht tallen stonden
 
Houde / hi esser met ghebonden.
 
En es gheen here so hoghe /
 
Keyser / grave no hertoghe /
 
Hine sal papen altoes eren;
1225
Want si sijn vicarijse Ons Heren
 
Gheset hier in Cristus stede /
 
En̄ den ghenen maken mede
 
Die alle dinc ghemaect heeft /
 
En̄ sonder beghin en̄ inde leeft.
1230
Oec mach hi sonden vergheven /
 
Ia / daer toe dat verheven
 
Inghel no archangel en es /
 
Noch Cristus moeder / sijt gewes.
 
Dander poent es dat hi sal
1235
Die privilegien houden al /
 
En̄ die waerheyt van elker stede /
 
En̄ sijns lants recht daer toe mede;
 
Want nerghen met en mach een here
 
Sijn liede verwerken mere
1240
Dan dat hi sijn sartren breect /
 
Also ons een broet man spreect.
 
Oec so breect hi trouwe daer /
 
Dat es voer Gode harde zwaer;
 
Want elc here sal van rechter scouden
1245
Sijns lants recht wel houden;
 
Want woudse een ander breken /
 
Hi soudse oec moeten wreken.
 
Dat derde poent es dat een here
 
En sal nemen nemmer mere
1250
Van sinen forfeyten / dan
 
Hem dat vonnes ghegheven can.
 
Nemt hi meer / des gheloeft /
 
Dan es hi niet beter dan gheroeft.
 
Maer elc here / vroech ende spade /
1255
Sal daer af doen ghenade /
 
Also hi woude dat hem God dade
 
Als hi jeghen Hem yet mesdade;
 
Want sulke ghenade als men hier doet
 
Doet God ghinder / des sijt vroet /
1260
Daer af dat ic die waerheyt
 
Hier vore wel hebbe gheseyt.
 
Of een lantshere des heeft verdient
 
Dat God niet en es sijn vrient /
 
En̄ hem enen viant dan verwect
1265
Daer Hi sijn gramscap mede wreect /
 
Die welke met rove en̄ met brande
 
Comt in des heren lande /
 
Eest dan recht / dat maect mi vroet /
 
Dat tfolc dat ontghelden moet /
1270
Die onwet en̄ quaethede /
 
Die haer here / haer prince dede?
 
Hier antwerdic nu also /
 
Dat wel recht es / nu hoert hoe:
 
Dat die liede ghedoghen
1275
En̄ aensien met haren oghen
 
Dat haer here doet onwet /
 
En̄ lants recht breect met /
 
En̄ dat niet in tijts en weren /
 
Maer hem alles laten gheberen /
1280
So moeten sijt ontghelden mede
 
Die quaetheyt die haer here dede.
 
Ghelijc oft een here talder tijt
 
Sijn liede corrigeert en̄ castijt /
 
Also selen si / vroech en̄ spade /
1285
Alse haer here doet onghenade /
 
Die liede den here wederstaen
 
Als hi eneghe dinc wilt aengaen /
 
Die hem of sinen lande
 
Doen scade ofte scande.
1290
Die een vrije stat berechten /
 
En̄ die hem dan laten ontrechten
 
Die privilegien en̄ vrijheden
 
Die toe horen ere steden /
 
Om yemans danc oft gheniet /
1295
En̄ haer lijf daer vore en setten niet /
 
Sijn verloren / des sijt vroet /
 
Ere / lijf ende daer toe goet /
 
Om die ontrouwe / wet dat /
 
Die si daer doen hare stat.
1300
Dus so scriven ons / te waren /
 
Doude vroede die wilen waren;
 
Want ghemeyn orber / sonder letten /
 
Salmen voer allen orber setten /
 
Alse Arestotiles en̄ Plato /
1305
En̄ Tullius1 oec also /
 
En̄ ander meesters / wilt roeken /
 
Wel scriven in haren boeken.
 
Dese materie legghic neder /
 
Daer ic toe sal comen weder /
1310
Wilt God / die alle dinc bekint /
 
Alsic den derden boec hebbe gheint /
 
Die u leren sal hoe dat ghi
 
Van allen wraken sult sijn vri.
 
En wilt wanhopen twint /
1315
Wat wraken u God toe sint;
 
Want ghi seker sult sijn van desen
 
Dat hemelrijc u sal wesen.

Vorige Volgende