Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert– rechtenstatus

Auteursrechtvrij

Vorige Volgende


Van .VIII. Sibillen. C. XVIII. 1520[regelnummer] MI quam een out boec in de hant / Daer ic in ghescreven vant Van .VIII. Sibillen datmen leest / Die hier voermaels hebben gheweest. Sibillen dat waren vrouwen 1525[regelnummer] Die inden gheest consten scouwen / En̄ voersegghen en̄ voersien Dinghen die namaels souden gescien. Van desen was / alsic las aldus / Dochter van Troyen Priamus; 1530[regelnummer] Haer moeder hiet Ecuba / Die scone was / alsic versta. Dese dochter hiet wel wale Tyburizina in Griesche tale. Dese vrouwe was wijs ter core / 1535[regelnummer] En̄ voer al Asya dore Van lande te lande telker stede / En̄ predicte daer grote wijshede / En̄ leerde hoe die liede souden Hem wel en̄ wettelijc houden. 1540[regelnummer] In Affrike quam si daer naer /
[pagina 340]
En̄ predicte oec mede aldaer / En̄ in Etyopen oec also / En̄ in Egypten oec daer toe / En̄ oec int grote Babylone. 1545[regelnummer] Dese vrouwe was harde scone / En̄ so gratiose in hare woerde Datse al tfolc gherne hoerde / En̄ so lieflijc in haer wesen Datment cume mochte lesen / 1550[regelnummer] En̄ propheteerde vele den lieden Dinghen die namaels ghescieden / En̄ noch gheschien hier en̄ daer / En̄ noch gheschien selen hier naer. Int leste quam die mare 1555[regelnummer] Te Rome in die stat van hare / En̄ die Romeynen dadent te hant Den coninc Ianuus becant Vander vrouwen wijsheyt groet / So dat hi die brouwe ontboet 1560[regelnummer] En̄ ontfincse met groter eren. Doen begonste die vrouwe leren / En̄ predicte so subtile woerde Dat hi des ghelijx noyt en hoerde: So bequame waren haer woert. 1565[regelnummer] Nu hoert hier groet wonder voert.

Vorige Volgende