Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Vanden yersten wraken Ons Heren. Cap. I.

35
IN dien dat ic merke en̄ scouwe
 
In doude Testament en̄ int nouwe /
 
In hystorien en̄ in corniken /
 
En̄ in anderen des gheliken /
 
Hoe God te meneghen stonden
40
Ghewroken hevet die sonden /
 
En̄ noyt ghedoghen en woude
 
Dat onrecht langhe staen soude /
 
En̄ wraect altoes swaerlike /
 
Soe ontsic ic mi sekerlike
45
Dat God sal wreken donghelike /
 
Dat hi heeft bi vele daghen
 
Harde guetlike verdraghen /
 
Mids sire ontfermecheyt.
 
Maer ic duchte sine gherechticheyt
50
Hem daer toe sal verwecken saen /
 
Dat Hi harde swaerlike sal slaen;
 
Want die edele gherechtichede /
 
Daer alle doghet in houdt stede /
 
Es wt ertrike al verdreven /
55
En̄ hier en es niet anders bleven
 
Dan hoverde / ghierecheyt en̄ nijt.
 
Ay / Gods Sone ghebenedijt!
 
Laet uwe wrake stille staen /
 
En̄ en wreect niet also saen.
60
En̄ hoe God / die altoes leeft /
 
Van beghinne ghewroken heeft /
 
Dat willic u toenen claer
 
Met exemplen hier naer.
 
Merct yrft aen Lucifere
65
Die vanden inglen was een here /
 
Hoene God om sinen overmoet
 
Warp inder helscher gloet /
 
Daer hi en̄ sijn gheselscap al
 
Ewelijc in quellen sal.
70
Merct oec hoe Hi aen Adame wrac
 
Dat een ghebot dat hi brac /
 
Niet aen Adame allene /
 
Maer aen alle mensche ghemenc /
 
Dies noch heden alle daghen
75
Alle die werelt mach beclaghen.
 
Nu merct noch met sinne
 
Van Adaems sone Caymne /
 
Die sinen broeder sloech doet
 
Van hate en̄ van nide groet;
80
Daer om datten God ten selven stonde
 
Vermalendyde metten monde /
 
En̄ seder / als ment bescreven vint /
 
Scoten doet sijns selfs kint.
 
Nu merct hoe God op eenre stonde
85
So swaerlijc wrac die sonde /
 
Doen Hi den mensche was so gram
 
Dat Hi hem allen dleven nam
 
Metter deluvien groet /
 
Daer si alle in bleven doet.
90
Sonder si .viij. behielden dleven /
 
Die in die arke henen dreven.
 
Nu merct dit voert hier na
 
Van Sodoma en̄ van Gomorra /
 
En̄ andre steden / twaren /
95
Die al vol liede waren /
 
Hoe datse God in eenre stonden
 
Versincken dede in haer sonden.
 
Nu merct vanden coninc Pharaone /
 
Die in Egypten droech crone /
100
Hoe datten God verdranc
 
En̄ sijn heere breet en̄ lanc /
 
Om dat hi swaer was en̄ fel
 
Den kinderen van Ysrahel.
 
Nu merct voert hoe dat tsolc quam
105
In die woestine / en̄ anenam
 
Dattet afgode beedde an /
 
En̄ also ict ghemerken can /
 
Moesten daer om sterven dan
 
Vele meer dan dusent man.
110
Nu so merct noch hier bi
 
Vanden goeden man Hely /
 
Om dat hi niet te tide
 
Sine kindre en castide
 
Doen si quaet hadden ghedaen /
115
Brac hi daer na den hals saen.
 
Nu merct Saule den coninc /
 
Hoe wel dat hem in hant ghinc /
 
En̄ hoe dat hi die viande versloech
 
Die wile dat hi Gode aendroech
120
Die victorie en̄ die eere;
 
En̄ doe hijs en dede niet mere /
 
Wert hi ghedoedt iammerlike /
 
En̄ David ghewan sijn rike.
 
Nu merct vanden coninc David /
125
Om dat hi op enen tijt
 
Sinen ridder dede nemen dlijf /
 
Om dat hi hebben woude sijn wijf /
 
Doen soude Onse Here al te hant
 
Gheplaghet hebben al sijn lant;
130
Maer sijn berou was sulc der af
 
Dat hem God al vergaf;
 
Doch die yrste vrocht verdarf
 
Die hi ane die vrouwe verwarf.
 
Merct van Alexandren mere /
135
Die van enen maten lanshere
 
Conmc wert gheweldechlike
 
Van al desen ertrike /
 
Daere hi .xij. jaer om vacht;
 
En̄ als hijt al toe hadde bracht /
140
So inde hi iammerlijc sijn leven;
 
Want hi wert met fenine vergheven
 
Vanden ghenen in dat lest
 
Die hi betroude alder best.
 
Dus so wrac Onse Here daer
145
Meneghe scade en̄ groten vaer /
 
En̄ daer toe menech mans slacht
 
Die hi in ertrike hadde ghewracht.
 
Aldus so quam na ghelike
 
Gods wrake altoes striken.

Vorige Volgende