Nederlandsche gedichten uit de veertiende eeuw van Jan van Boendale, Hein van Aken e.a.

Wat leven tpaepscap houden soude. XLI.

NV so segt mi / lieve her Ian /
Wat leven souden si leyden dan
Die papen / dien so vele ghebreect
Dat ghise aldus sere verspreect?
Si hebben u yegherinc qualijc ghedient.
Ghi scijnt so cleyne sijn haer vrient /
Dat toendi in u redene wel.
Twaren! Wouter / dat es spel.
Ic ben haer vrient / hoe dat gheet;
Maer dat si mesdoen dats mi leet
Die ghene diet ghelove souden
En̄ die wet staende houden /

[p. 264]

3760

En̄ Cristus vicarise mede

 

Gheset in sine heylighe stede /

 

Dat die met sonden sijn ghebonden

 

Die vergheven die sonden /

 

En̄ die sondaren absolveren moghen /

3765

Dat dunctmi qualijc voeghen.

 

Wouter / papen souden wesen

 

Al puer / vol der Gods vresen /

 

Oetmoedech en̄ ghestadech /

 

Ontfermhertich en̄ ghenadech /

3770

Waerwoerdech in hare spraken /

 

En̄ gherecht in allen saken /

 

En̄ souden altoes selve hanteren

 

Dat si den volke sermoneren /

 

So dat beyde wijf en̄ man

3775

Goede exemple namen daer an.

 

Sonderlinghe reyne van live /

 

Want haer wet verbiedt hem wive;

 

Ghemate van drancke en̄ van ate /

 

Scoppen noch scheren opte strate /

3780

Simple wandelinghe en̄ abite /

 

In vreesen leyden haren tijt /

 

En̄ der kerken goet broech no spade

 

Niet verteren in overdade /

 

Noch oec ontsparen / om dat si

3785

Haer maghe selen goeden daer bi;

 

Want Cristus vaderlike goet /

 

Daer hi om storte sijn bloet /

 

Dats over haer noetdorft blijft /

 

Als ons een goet man bescrijft /

3790

Dats der armer recht ghedeel /

[p. 265]

 

Of men soudt keren al gheheel

 

In meerdernessen der eren

 

En̄ des diensts Ons Heren.

 

So souden si in hare dinc

3795

Den wech gaen dien Cristus ghinc /

 

En̄ leyden sijn leven sijn;

 

Want si sine iongheren sijn

 

Die gaen souden sinen pas /

 

Want hi dierste priester was

3800

Daer na si hen hier souden

 

Regeren ende houden.

 

Dat hoechste dinc dat enech es

 

Dats priesterscap / sijts gewes;

 

Want priesters in waerre saken

3805

Den ghenen moghen maken

 

Die hen selven ghemaect heeft /

 

En̄ daer toe algader dat leest.

 

Des Onse Vrouwe no dingle fijn

 

En gheen mechtich en sijn /

3810

Dat vermach die priester allene

 

Met dinghen harde clene /

 

Dat es met woerden vive.

 

Ay priesters / lede keytive /

 

Hier op so soudi dincken

3815

Alse ghi in etene en̄ in drincken /

 

In hoverden en̄ in overtuldecheyden

 

In vrecheyden en̄ in ghierecheyden /

 

En̄ in oncuuscheyden sit /

 

Daer ghi u leven in verslit.

3820

Legt as den ghiereghen name

 

En̄ uwer vulre oncuyscher blame /

[p. 266]

 

En̄ gaet den wech dien Cristus heeft ghegaen /

 

Of ghi sult onlanghe staen

 

In rasten ende in eren /

3825

Als ons die prophetien leren.

 

Wouter / dusdanen leven souden

 

Met rechte die priesters houden /

 

Die leven wouden in eren /

 

En̄ behouden die hulde Ons Heren.