Nederlandsche gedichten uit de veertiende eeuw van Jan van Boendale, Hein van Aken e.a.
(1869)–F.A. Snellaert–
Auteursrechtvrij
[pagina 174]
| |
Die der stat bordene draghen /
Alse scepenen / raetsmanne en̄ ghesworne.
1085[regelnummer]
Dat lust mi nu wel te hoerne /
Want mi ende andren knechten
Dunct dat sijt qualijc berechten
En ghemeynen orbore niet en aensien /
Maer haers selfs bate voert tien.
1090[regelnummer]
Wouter / de rade vanden steden
Sijn al vol behendecheden /
En̄ trecken haer stede also voert
Dat si een stat maken van eenre poert /
En̄ copen hen selven also vrij
1095[regelnummer]
Ieghen den here / so dat si
Mechtech sijn en vermoghen /
En̄ hebben den heren ontoghen
Hare macht also vele
Dat hen dicke gaet uten spele /
1100[regelnummer]
En̄ bi haren rade moeten ghereet
Werken / wien lief / wien leet;
Want volx en̄ scats hebben si mere
En̄ wijsheyden dan die here.
Maer Wouter / sijt seker des /
1105[regelnummer]
Danxstelijcste dinc dat enech es /
Of daer ic af hebbe horen lesen /
Dat dunct mi scependom wesen;
Want si en hebben gheen recht bescreven /
En̄ si moeten vonnesse gheven
1110[regelnummer]
Wt haren hoefde na tferlien
En̄ tfertrec vanden partyen.
Gaen si dan uter gherechtichede
Om onste / om nijt / om ghichte mede /
| |
[pagina 175]
| |
Si sijn ewelijc verloren /
1115[regelnummer]
Ofte si moeten hen verstoren
Also vele / dat verstaet /
Als hen nam dat vonnesse quaet.
Oec so moet hi beteren mede
Dat hi uter gherechtichede
1120[regelnummer]
Gaen dorste om eneghe sake /
Of God sal sine wrake
Op hem senden hier
Of ghinder int ewelike vier.
Mi wondert boven allen doene
1125[regelnummer]
Hoe dat yeman es so coene
In banc sitten te gaen /
Of daer over te staen
Daermen yeman sal ontgheven
Goet / ere ende leven;
1130[regelnummer]
So misselijc eest als een wijs man seeght
Waer dat recht verborghen leeght.
Nochtan vindt men vele ghiere
Die scependom copen diere
Om tfordeel datmen daer in vindt /
1135[regelnummer]
Maer om gherechtichede twint.
Wouter / wie rijdt ofte loept
Daer hi-scependom coept /
Die coept die helle / sijts gewes;
Want van tienen cume een es
1140[regelnummer]
Die recht draghet de waghe /
Vrienscap / nijt / miede of maghe
En treckenen / voer waer gheseyt /
Selc stont uter gherechticheyt;
Want dese makenen so verblindt
| |
[pagina 176]
| |
1145[regelnummer]
Dat hi trecht niet en kint;
Want die onstege wille dringt so voert
Dat hi dat recht al versmoert.
Hen dunct / si hebbent al verwonnen
Als si scependom ghecrighen connen;
1150[regelnummer]
Hebben si die ere en̄ tgheniet /
Op die bordene en achten si niet
Diemen so groet en̄ so swaer
Op die siele laedt daer.
Wouter / ic seggu wel te voren /
1155[regelnummer]
Hi was cume ye gheboren
Die wijs ghenoech was in scependoem:
Al heves die meneghe roem
Dat hi te scependome comen si /
Hem waer vele beter dat hi
1160[regelnummer]
Scape huedde opter heyden;
Want te groter onsalicheyden
Moet met hem hier na vergaen
Daer hi ten ordele sal staen /
Daer men elken meten sal na tfat /
1165[regelnummer]
Daer hi hier op ertrike mede mat;
Dan sal dit grote voerdeel keren
In groten rouwe en̄ in verseeren /
Ia / eest dat hi ye ghedede
Of riet ieghen gherechtichede;
1170[regelnummer]
Want gherechticheyt ghebiedt opten ban
Datmen tsine gheve elken man.
Wouter / in elken scepene fijn
Moeten dese .iij. poente sijn:
Wijshent en̄ gherechtichede /
1175[regelnummer]
En̄ rijpheyt van daghen mede /
| |
[pagina 177]
| |
Want die ioeght wilt selden ghedogen
Dat die ionghe wijs wesen moghen.
Den ghiereghen oec / wats ghesciet /
En salmen scepen maken niet;
1180[regelnummer]
Want ghierecheyt heeft met haere moert
Gherechticheyt dicke ghestoert.
Tontide waert hi gheboren
Die te scependom wart ghecoren /
En si dat hijs wel weerdech si /
1185[regelnummer]
Also ghi nu horet segghen mi.
In steden merkic .ij. dinghe
Die mi wanhaghen sonderlinghe:
Dierste dat mi wanhaghet
Dats alse een arm portre claget
1190[regelnummer]
Die ghenen vrient en heeft inden raet/
Datmen hem niet bi en staet/
Noch en berecht in gheliken /
Also men doet den mechteghen riken.
Dander es dat die heren /
1195[regelnummer]
Die de stat wenden ende keren /
In die borse yet steken van dat
Comt of ruert vander stat;
Want alle die bate / nacht en̄ dach /
Die vander stat comen mach
1200[regelnummer]
Salmen legghen / eest gelt / eest pant /
In sekerre ghewaregher hant /
Weder het si cleyne of groet;
En̄ alse die stat hevet noet /
Teenen ghemeynen orboer so
1205[regelnummer]
Salmen gaen daer toe
Wijsselijc en̄ met maten /
| |
[pagina 178]
| |
En̄ enen penninc niet quisten laten;
Want al maect men enen man
Scepen of raetsman /
1210[regelnummer]
Der stat goet en es niet sine /
Also goet als een potenine.
Hem dies niet meer en behoert
Dan den maetsten vander poert;
Want eest groet of cleyne /
1215[regelnummer]
Het es al der stat ghemeyne:
Daer en heeft nieman ane recht /
Out no ionc / here no knecht.
|
|