Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert– rechtenstatus



[pagina 122]
Hoe Prudentia die soene maecte. C. LV. 3420[regelnummer] DEse drie trocken achterwaert / Prudentia ghinc metter vaert Te haren man ende heeft hem vertrocken Al dat si hadden ghesproken / Also ghelijc alse ghi 3425[regelnummer] Nu hebt horen segghen mi / En̄ heeft hem ghevraghet Hoe dat hem behaghet. Alse Melibeus heeft vernomen Dat si te berouwe sijn comen 3430[regelnummer] En̄ haer mesdaet ghien / Sprac hi te hant mettien: ‘So wie dat hem sculdech gheeft Van dat hi mesdaen heeft En̄ ghenade dan begheert / 3435[regelnummer] Es ghenaden dan wel weert. Daer bi / vrouwe / dat verstaet / Dunct mi goet wesen u raet / Eest dat ons onse vriende raden En̄ sijs ons wel ghestaden.’ 3440[regelnummer] Die vrouwe loech en̄ sprac echt: Seker here / dat es recht / Dat ghi die soene anegaet Overmids uwer vriende raet Die dat orloghe souden draghen 3445[regelnummer] Met u / woudijt emmer waghen: Nu hebben si te hant Om maghe en̄ om vriende ghesant /
[pagina 123]
En̄ hebben hem vertrocken voert Also ghi vore hebt ghehoert / 3450[regelnummer] En̄ vragheden den goeden lieden Wat si hem hier toe rieden. Die vriende te samen ghinghen En̄ aensaghen alle die dinghen / En̄ tracteerden langhe van desen 3455[regelnummer] Welc dat beste mochte wesen. Sulken dochte goet wesen die raet / En̄ sulken dochti harde quaet / Doch concordeerden si int leste Dat die pays waer beste 3460[regelnummer] En̄ rieden sere daer toe. Prudentia sprac doe: Ic hebbe altoes horen segghen Men soude weldaet niet verlegghen / Noch versten alst waer tijt 3465[regelnummer] Men soudt doen sonder respijt; Daerbi cortet / dat radic u / Dat ghi na soudt doen / dat doet nu. Dus heeft men alte hant Wise boden henen ghesant 3470[regelnummer] Die den viant seyden Dat si quamen sonder beyden / Haer here waer also bevaen Dat hise soude gherne ontfaen Te sire vrienscap / dat ware waer / 3475[regelnummer] En̄ hadde sine vriende ontboden daer / En̄ dat si aldaer ter stede Haer borghen souden bringhen mede. Si dancten den boden sere
[pagina 124]
En̄ spraken: ‘Segt onsen Here / 3480[regelnummer] Her Melibeus / dat hi Hem niet en belghe / want wi Selen schiere comen te hem wert / En̄ al doen dat hi beghert. Doen sprac een van hem lieden: 3485[regelnummer] Laet ons onse vriende ontbieden / So dat wi comen daer Eerlijc met groter scaer. Doen sprac een die daer stoet Dat dien raet niet en waer goet; 3490[regelnummer] Want des volx menechfuldechede Hadde dicke te menegher stede Groten orbore belet / Sine wouden niemanne met Dan haer borghen in die vaert / 3495[regelnummer] Aldus trocken si derwaert. Doe si int huus quamen ghegaen / Es Melibeus opghestaen En̄ sprac: ‘Ghi heren / wilt mi verstaen / Ghi hebt mi grote scande ghedaen / 3500[regelnummer] Daer ghi ane met rechte groet Wel verdient hebt die doet. Waer bi ic weten wille van u Of ghi des te mi wert nu / Bliven wilt onghelet 3505[regelnummer] En̄ te vrouwe Prudentien met. Si antworden ende seyden doe: ‘Here / wi sijn te quaet daer toe / Dat wi in uw huus comen souden / So groet sijn onse scouden:
[pagina 125]
3510[regelnummer] En̄ dat wi hier comen nu / Dat es op ghenade van u. Beyde van goede en̄ van live Willen wi tuwent bliven.’ Mettien vielen si ter erden 3515[regelnummer] Op haer kniën te sire werden / Ende weenden harde sere. Doen dat sach die here / Nam hise op lieflijc te hant En̄ hiefse op daer hise vant; 3520[regelnummer] En̄ heeftse te sinen wille ontfaen En̄ hietse weder thuus wert gaen / En̄ dat si over .viij. daghe te samen Aldus weder voer hem quamen. Dus scieden si van daer doe 3525[regelnummer] En̄ waren blide ende vroe.

Vorige Volgende

Hoe Prudentia die soene maecte. C. LV.