Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Van Verduldecheden. Cap. XLVI.

 
VErduldecheyt dats een doghet
2825
Die den mensche sere verhoghet;
 
Want wat si siet of hoert /
 
Sine wert daer om niet ghestoert.
 
Onrecht / plaghe en̄ messal
 
Can si verdraghen over al
2830
Sonder ontsetten van sinne:
 
Dits een poent van groten ghewinne.
 
Verduldecheyt / voer waer gheseyt /
 
Es een verborghen rijcheyt;
 
Want si den mensche sekerlike
2835
In sijn herte maket rike /
 
Beyde van rasten ende van vrede;
 
Oec so wintmen daere mede
 
Hemelrijc / dat es waer.
 
Haer en es niet te swaer;
2840
Si lidet lichtelijc al /
 
Eest verlies / eest ongheval /
 
Verdrachlijcheyt can tallen daghen
 
Die wrekers uten lande jaghen.
 
En̄ si blijft sittende vast
2845
In hare ghemac en̄ in hare rast /
 
En̄ si maect salich elken man
 
In wien dat si wonen can.
 
Die sinen tijt soe wil leyden
 
In rusten en̄ in salicheyden /
2850
Op erdrike in sine daghen /
 
Die moet leren verdraghen;
 
En̄ God / na dit corte leven /
 
Sal hem hemelrike gheven /
 
Also hi selve spreect daer
2855
In die Ewangelie claer.

Vorige Volgende