Nederlandsche gedichten uit de veertiende eeuw van Jan van Boendale, Hein van Aken e.a.

[p. 96]

Melibeus antworde ende vander avonturen. C. XLIII.

MElibeus sprac: ‘Wats ghesciet /
Sulke wrake en willic niet /
Al dade hem die rechter blame
Of have of goet van hem name /
Sine soudens niet achten sere /
En̄ ic souds hebben onnere
Dat ic den rechtere bidden soude
Dat hi mi hier af wreken woude.
Sone haddic / des sijt vroet /
Niet vele ghecoelt minen moet;
Daer bi willict selve so wreken /
Men sal daer ewelijc van spreken.
Ic beveelt der avonturen /
Die mi heeft in menegher uren
Gheluc ghegheven ende seghe /
Beyde in velde ende in weghe;
Die mi niet en sal afgaen /
Si heeft mi dicke bi ghestaen.

Prudentia sprac: wats ghesciet /

Der avonturen en gheloeft niet.
So waerdi harde sot behaghel;
Davonture es een broesch naghel /
Die nemen en can noch gheven /
Noch noyt en hadde leven.
Dit segghic u bi vele saken /
Die Seneca cont can maken.

Seneca seghet sonder helen:

Die hem der avonturen bevelen

[p. 97]

 

Sijn onbewaert / sijts gewes;

2685

Want davonture niet en es.

 

Noch seyt Seneca / alsict las /

 

Dat die avonture es een glas /

 

Dat scone blict ende claer /

 

En̄ cort leghet ontwee daer.

2690

Oec seghet een meester wijs:

 

Davonture es als een ijs

 

Dat starc scijnt en̄ nochtan

 

Breket onder den man /

 

En̄ verdrinct eer hijt weet /

2695

Dits emmer een cranc beheet.

 

Also een sot medicijn /

 

Metter quader consten sijn /

 

Die liede dodet te menegher ure

 

Also doet die avonture:

2700

Dus en suldi u / wats ghesciet /

 

Der avonturen ghetroesten niet.

 

Sijs onghedurech en̄ onghestade /

 

En̄ bringt den meneghen in grote scade;

 

Want in onghedurech ertrike

2705

En es twint ghedurech waerlike.

 

Al dunct u in uwen waen

 

Dat u davonture wel heeft ghedaen /

 

En̄ gheholpen op meneghen dach /

 

Ontsiet u dat si keren mach.

2710

Heeft een man op een ure

 

Ofte op twee goede avonture /

 

So waent hi dan dat si sal

 

Hem volghen over al /

 

En̄ maect van hem euen ghec

[p. 98]

2715

En̄ latene dan inden strec.

 

Davonture niet doen en can /

 

Noch noyt lijf noch gheest ghewan /

 

Simpel volc doet bekint

 

Dat davonture es blint /

2720

Dat en es al gader niet /

 

Sine es blint / noch en siet.

 

Wildi dan van uwer sake

 

Ghewinnen rechte wrake /

 

Gaet ten gherechten rechtere dan /

2725

Die alle onrecht wreken can /

 

En̄ niet en laet onghewroken;

 

Want hi heeft selve ghesproken:

 

Ghef mi die wrake / ic sal wreken.

 

Paulus hoert men oec spreken:

2730

Die wel doet / hi sal ontfaen

 

Loen daer af / dats sonder waen /

 

Hine sal oec niet / dat verstaet /

 

Allene wreken haer mesdaet;

 

Maer hi sal u in vreden setten

2735

Ieghen al dat u mach letten.