Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Van husen en̄ van borghen te bewarene. C. XXXVIII.

 
MElibeus / segt mi voert
 
Hoe ghi verstaet dat woert
2300
Dat u doude wise seyden /
 
Dat ghi met goeder wijsheyden
 
Uwe huse soudt wareneren /
 
Woudi u toten orloghe keren.
 
Doen antworde Melibeus:
2305
Vrouwe / dat versta ic aldus /
 
Dat ic mijn huus besetten sal
 
En oec mine torren al.
 
Daer ic inden orloghe
 
Mi met behelpen moghe /
2310
En̄ dat mi oec van dien
 
Mijn viande te meer ontsien.
 
Prudentia antworde doe:
 
‘Hoe mochtic dat bringhen toe?
 
Die cost waer u alte groet /
2315
Want die slote ligghen bloet;
 
En̄ te vallen te meneghe stat /
 
Die men reken moeste bat
 
En̄ stofferen harde wale /
 
Met boghen en̄ met springale /
2320
Met drancke en̄ met spisen /
 
Met coenen en̄ met wisen
 
Lieden / daer ghi mocht besetten mede
 
Husen en̄ torren telker stede.
 
En̄ dat sal u costen so zeer /
2325
Ghine verwinnet nemmermeer.
 
En̄ als ghi al desen cost
 
Hebt toe bracht na uwen lost /
 
So eest al niet en si dat ghi
 
Ghetruwe liede hebt daer bi.
2330
Ghine sijt maer een man;
 
En̄ sijn si u onghetruwe dan /
 
So wet wel te voren
 
Dat ghi tspel hebt verloren /
 
En̄ sult dan weder moeten keren
2335
Met scanden en̄ met onneren.
 
Ghetruwe liede sijn beter vele
 
Dan borghe sijn ofte castele;
 
Die hem op sine borghe verlaet
 
Es dicwile zere ghehaet
2340
Van sinen ghebueren in dien
 
Want hi es van hem ontsien;
 
En̄ so wien men ontsiet /
 
En̄ mach ghemint wesen niet.
 
Hets dicke gheseyt / twaren /
2345
Die man en mach niet wel varen
 
Langher dan willen sine gheburen /
 
Goede gheburen sijn starke muren.
 
Het es bedorven menech here
 
Om dat hi hem verliet te zere
2350
Op sine starke huse alsoe /
 
En̄ dat bringht hoverde al toe /
 
En̄ bloetheyt menghet daer mede
 
Die noyt en hilt haer stede /
 
En̄ meest hoverde / des sijt vroet /
2355
Dat die int lest vallen moet.

Vorige Volgende