Nieuwe testament (Noordnederlandse vertaling)

XX

Ende ic sach enen enghel neder dalende van den hemel, hebbende den slotel des afgrondes ende ene grote ketene in sijn hant, Ende hi greep den drake, dat oelde serpent, dat die viant is ende Sathanas, ende banden duzent jaer ende warpen in den afgront en[de] sloten toe, ende beseghelde over hem, op dat hi voert an die lude niet en bedrieghede thent die duzent jaer vervullet worden. Hijr na moet hi ontbonden waerden een corte tijt.

Ende ic sach die zetele, ende sie saten daer op ende hem is dat ordel ghegeven, ende ic sach die zielen dier gheenre die onthovet waren om tghetughe Ihesu ende om dat woert Godes, ende die de beeste noch haer beelde niet aenbededen noch die haer teyken in haer voerhoefde niet ontfanghen en hebben of in haren handen, ende sie leveden ende regnierden mit Cristo duzent jaer. Ende die ander doden en leveden niet.

Dit is die ijrste verrisenisse thent die duzent jaer vervullet waerden. Salich ende heylich is hi, die in die ijrste verrisenisse een deel hevet. In dien en hevet die ander doet en gheen macht, mer si sullen wesen priesteren Gods ende Cristi ende si sullen mit hem regniren duzent jaer.

Ende als die duzent jaer voeleyndet sijn, sal die viant uten kerker ontbonden waerden ende sal uyt ghaen ende verleyden dat volc, Gog ende Magog, op die vier hoken van der eerden, ende hi salse vergaderen in enen strijt, welker ghetal is als

[fol. 175r]

dat zant des meers. Ende si sijn op gheclommen op die breetheyt der eerden ende si ghinghen omme die versameninghe der hilghen ende die hilghe stat ende een vuer daelde neder van Gode vyt den hemel ende verslantse, ende die duvel die sie verleyde, is gheworpen in die zee des vuers ende des sulphers, daer die beeste ende die valsche prophete nacht ende dach sullen ghecruyst waerden in ewen tewen.

Ende ic sach enen groten blenckenden throen ende den ghenen die daer op sat, van wies theghenwordicheyt hemel ende eerde vliet, ende van hem en is gheen stede ghevonden. Ende ic sach die doden, groet ende cleyne, staende voer die theghenwordicheyt des throens, ende die boke sijn op gheloken. Ende een ander boec is op gheloken, dat een boec des levens is, ende die doden sijn gheordelt van dien dinghen die in den boec ghescreven waren na haren werken. Ende dat meer gaf hem sijn doden die daer in waren, ende die doet ende die helle gaven die doden die in hem waren, ende van enen yghelich is gheordelt na sinen werken. Ende die helle ende die doet sijn gheworpen in die zee des vuers. Dit is die ander doet. Ende elc die in den boec des levens niet ghevonden en is bescreven, die is gheworpen in die zee des vuers.