Nieuwe testament (Noordnederlandse vertaling)

XXI

Ende ic sach enen nyen hemel ende een nye eerde, want die ijrste hemel ende die ijrste eerde is heen ghegaen, ende die zee en is nu niet. Ende ic, Johannes, sach die heylighe stat, dat nye Iherusalem, neder dalende van den hemel, bereydet van Gode als een vercierde bruyt haren manne. Ende ic hoerde een grote stemme van den hemel segghende: Sich, die tabernakel Godes is mitten menschen ende die Hilghe Gheest sal mit hem wonen ende si sullen sijn wolc wezen ende God selve sal mit hem haer God wezen, ende God sal alle tranen van den oghen der hilghen wisschen, ende gheen doet en salre voertmeer wezen, noch weninghe noch ropinghe noch rouwe en salre voertmeer wezen, die ijrst heen ghegaen sijn. Ende die in den throen sat seyde: Siet, alle dinc make ic nye. Ende hi seyde my: Scrijf, want dit sin die alre trouweste woerde ende warachtich. Ende hi seyde my: Het is ghedaen. Ic bin alpha ende o, dat is tbegin ende dat eynde. Ic sal den dorsteghen te vergheves gheven van der fonteynen des levenden waters. Die verwinnet, sal deze dinghe bezitten, ende ic sal hem God wezen ende hi sal my een soen wezen. Den vresighen ende den onghelovighen ende den verblinden ende den manslachters ende den oncuysschers ende der verghevers mit venine ende den afgode aenbeders ende alle den loghenachtighen, haer deel sal wezen in die bernende zee van vuere ende van sulpher, dat die ander doet is.

Ende een van den zeven enghelen quam tot my, die de zeven fiolen hadde, vol van den lesten plaghen, ende hi sprac mit my ende seyde: Com, ic sal dy wisen die bruyt, des lams wijf. Ende hi voerde my op in den gheest in enen groten hoghen berch ende hy toghede my die heylighe stat Iherusalem, neder dalende van den hemel, van Gode, hebbende die claerheyt Godes ende haer licht ghelijc den duerbaren stene, recht als die steen jaspis ende alze dat cristalle.

[fol. 175v]

Ende si hadden een grote mure ende een hoghe, twalef poerten hebbende ende in den twalef poerten twalef enghelen ende twalef namen die inghescreven sin, die twalef namen der gheslachte van den kinder van Israel, drie poerten van den Oesten, drie poerten van den Noerden, drie poerten van den Zuden, iii poerten van den Westen. Ende die mure van der stat hadde twalef fundamente ende daer in die twalef name der apostelen ende des lammes.

Ende die mit my sprach, hadde in der maten een gulden riet, dat hi meten solde die stat ende haer poerten ende haer mure. Ende die stat [is] int vierhoecte gheset: haer lancheyt is alsoe groet als die breetheyt is, ende hi mat die stat van den guldene riete by twalef duzent stadien, haer lancheyt, haer breetheyt, haer hoecheyt sijn ghelijc. Ende hy mat haer muren: hondert vier ende viertich cubitus, mitter maten des menschen, die des enghels is. Ende die maetsinghe van hare mure was van jaspide, mer die stat selve beteykent reyn golt ghelijc den reynen glaze. Die fundamente van der stat muren sijn verciert mit allen duerbaren ghesteente. Dat ijrste fundament is een jaspis, dat ander een saphirus, dat derde calcedonius, dat vierde smaragdus, dat vijfte sardonix, dat seste sardius, dat sevende crisolitus, dat achtende berillus, dat neghende topacius, dat tiende crisopassus, dat elfte jacinctus, dat twalefte ametistus. Ende die twalef poerten sijn al doergaende twalef margareten, ende elke poerte waren van allen margareten, ende die straten van der stat sijn gholt als doerschinende glas.

Ende ghenen tempel en sach ic in der stat, want God, die almechtighe Here, ende dat lam is haer tempel. Ende die stat en behovet der sonnen niet noch der manen, dat si daer in lichten, want die claerheyt Gods sal sie verlichten ende dat lam sal haer lanterne wezen. Ende die lude sullen in sinen lichte wanderen ende die coninghe der eerden sullen haer glorie ende haer eer daer in brenghen, ende haer poerten en sullen des nachtes niet ghesloten waerden, want daer en sal gheen nacht wezen, ende sie sullen die glorie ende die ere der lude daer in brenghen. Ende daer en sal niet bevleckets in ghaen noch dat ommenschelicheyt doet ende loghene, dan die ghescreven sijn in den boec des levens des lammes.