IIII
Doe wart Ihesus gheleyt inder woesteinen vanden gheeste, dat hi temptiert soude werden vanden duvele. Ende doe hi ghevastet hadde xl daghe ende xl nachte, daer nae hongherde hem. Doe quam die temptiere of die aenvechter tot hem ende seyde: Of du die Godes sone biste, soe sech, dat dese steen broet werden. Hi antworde hem ende seyde: Het is ghescreven: Niet allene inden brode en levet die mensche, mer in allen worde, dat daer gaet uut den monde Gods.
Doe nam hem die viant up in die heylighe stat ende setten op een verheven stat inden tempel ende seyde hem: Bistu die sone Gods, soe laete di van achter hier neder, het is ghescreven, dat hi sinen enghelen hevet gheboden van di: In horen handen sullen si di vueren, op dattu licht dinen voet niet en stoetste aenden stene.
Doe antworde hi anderwerf: Du en salste niet temptieren dinen Heer, dinen God.
Noch voerden hem die viant in enen seer hoghen berch ende toende hem alle die rike der werlt ende hoer glorie ende seyde hem: Alle dit sal ic di gheven, eest dattu neder valste ende aenbedeste mi. Doe antworde hem Ihesus: Ganc, Sathanas! Het is ghescreven: Dinen Heer, dinen God, saltu aenbeden ende hem alleen dienen. Doe liet hem die duvel ende die enghelen quamen ende dienden hem.
Doe Ihesus hoerde dat Johannes ghevanghen was, ghinc hi en wech in Galileen, ende liet die stat van Nazaret ende quam ende woende in Capharnaum bider zee inden eende van Zabulon ende Neptalim, op dat vervullet worde dat die prophete Ysayas ghesproken hevet: Tlant van Zabulon ende tlant van Neptalim die wech der zee over die Jordane van Galileen, dat volc der heydenen, dat sat in duusternissen, sach een groet licht, ende die saten int rike des scems des dodes, een groet licht is hem op gheboren.
Daer na began Ihesus te prediken ende te segghen: Doet penitencie ende dat rike der hemele sal ju naken.
Ihesus wanderde bider zee van Galileen. Daer sach hi twe bruederen: Symon die gheheyten is Peter, ende Andreas, sinen brueder, uut werpen hoer nette in die zee, want si waren visschers. Ende hi seyde hem: Coemt, volghet mi, ic sal u maken visschers der menschen. Doe lieten si rechte voert hoer nette ende volgheden hem.
Doe ghinc hi van daer, daer hi sach twe ander brueders: Jacobe Zebedeus zone ende Johannes sinen brueder, buetende hoer netten in den scepe mit Zebedeus, horen vader, ende riepse. Rechte voert lieten si hoer nette ende horen vader ende volgheden hem.
Ende Ihesus ghinc in Galileen al omme lerende in hoer synagogen ende predicte dat ewangelium des rikes ende maecte alle quale ende siecte inden volke ghesont. Ende ene niwe gheruchte ghinc van hem over al Sirien, ende si brochten voer hem alle die onghesont waren van manigherhande quale ende mit pinen begrepen ende die vanden viande beseten waren ende die nae der manen loep cranc waren ende die verghichticht waren, ende hi makede se alle ghesont. Ende vole scaren van Galileen, vanden tien steden van Iherusalem, van Judea ende van over die Jordane volgheden hem alle nae.
Auteursrechtelijk beschermd